Ich Wu^elfinch von der Vreinstat burger vnd mein hausfraw vnd all vnser erben veriehen vnd tu^en chunt offenbar mit dem brief allen den die in sehent oder ho^ernt lesen, daz wir mit wol bedachtem mu^ot vnd mit rat vnserr pesten freunt vnd auch mit gu^etem willen vnd wart aller vnserr erben zu der zeit do wir ez wol getu^on machten, recht vnd redleich von rechter notdu^erft wegen gesatzzt haben die gu^et die hernach geschriben stent, dem erbern vnd dem wierdigen herren probst Weyganden von sand Florian vnd dem conuent vnd dem gotshaus daselb den Raennachhof vnd die mu^el dabey vnd die hu^ob ze O^etzeinsdorf gelegen in Lozzperger pharr, vnd die hu^eb genant Zeyrtz gelegen in Neunchircher pharr, vnd dieselben egenanten gu^et alle lehen sind von dem edeln hochgeporn fu^ersten von vnserm genaedigen herren dem hertzogen in O^estreich. Dieselben egenanten gu^ot haben wir in gesazzt mit allen nutzzen diensten vnd rechten vnd darzu gehu^ert ze holtzz vnd ze veld, versu^echt vnd vnuersu^echt auz vnserm nutz vnd gewer in die iern vmb anderthalb hundert alter wienner phenning der si vns gantz vnd gar verricht vnd gewert habent also mit beschaidenhait, daz wier die egenanten gu^ot alle mit einander aller ia^erleich von in ledigen vnd lo^esen schu^ellen vmb die egenanten anderthalb hundert phunt phenning vor liechtmess acht tag oder hinnach acht tag vnd an dhainem andern tag nicht, vnd schu^ellen si vns dann vnuerzogenleich ze lo^esen geben vnd an alle widerred (sic). Wier schu^ellen auch des egenanten satzzes vnd der gu^ot ier gewern sein fu^er allen chu^enftigen chrieg an aller stat all zeit, wo in sein not vnd du^erft geschiecht nach lantzrecht. Ta^et wir dez nicht, waz schadens des der vorgenant herre oder daz egenant gotzhaus vnd daz conuent schaden na^emen (sic), den er oder seiner chorpru^eder ainer bey seinen trewen gesprechen mag, den selben schaden schu^ellen wier in gantz vnd gar ablegen vnd widercheren vnd schu^ellen vns auch vmb denselben schaden phenten auf aller vnsrer hab, wo wier die haben vnd wo die gelegen ist versu^echt vnd vnuersu^echt auf wazzer vnd auf lande mit vnserm gu^etleichem willen an alles recht. Darvber ze einer offen v^erchu^end vnd ze einem waren sichtigen gezeug gib ich in egenanter Wu^elfinch disen offen brief fu^er mich vnd fu^er alle mein erben vnd fu^er allen chu^enftigen chrieg versigelten mit meinem anhangundem jnsigel, vnd ze einer pezzern gezeugnu^ezz der egeschriben sache versigilt mit des erbern herren hern Chu^enraten des Scha^ewrhekchen anhangundem jnsigel iem an schaden, der ze den zeiten lantrichter in der Ryedmarich ist gewesen. Der brief ist geben nach Christes gepu^orde dreutzehen hundert iar vnd darnach in dem siben vnd fu^emftzkistem iar an dem achten tag nach sand Agnesen tag.

Source Fulltext: OÖUB 7 (Wien 1876) S. 486f., Nr. 478