Ich Margret V/elreichs dez Maulhartz witib dem Got genad, ich Dietreich vnd Chu^enrat ier su^en paid pru^oder purger ze Ens veriehen offenleich an dem brief vnd tu^en chunt allen den di in sehent oder ho^ernt lesen, daz wir ze lehen haben von dem erbern herren probst Weyganten vnd dem gotshaus datz sand Florian ze vnsern dreyn leiben vnd ze vnsern tagen die zehent die hernach beschriben vnd benant sint, von erst den zehent auf dem hof ze Oberndorf, darnach den zehent auf dez gotshaus hu^eb in demselben dorff vnd den zehent auf dem Aigen da selbs daz auch dez gotshaus ist, darnach den zehent auf dem hof vor dem haus ze Volkchensdorf vnd daselb den zehent auf etzleichen reuten vnd aekchern vnd ga^erten der wol na^eun ist, darzu den zehent auf dem Aigen ze Gru^eb ob dem haus ze Volkchensdorf, die weilen Chu^enrat der Tanefu^ez purger datz Ens von dem gotshaus (ze) einen rechten leibgeding gehabt hat. Wier schullen auch also ia^erleichen an sand Florians tag ze einem zins raichen vnd geben zwelif phenning wienner mu^onzze dem vorgenanten gotshaus. wa^er aber daz das wir den vorgenanten zins an dem obgenanten tag nicht raichten vnd ga^eben, so schol darauf ye in viertzehen tagen ze wande1 wachsen sechtzig phenning vntzt ier sechs schilling werdent, vnd ist daz das wir der sechs schilling inner iars frist nicht raichen vnd geben, so schu^ellen wir geuallen sein von allen vnsern rechten die wir an dem vorgenanten zehent gehabt haben. Wier veriehen auch mer, daz nach vnsern drein leiben swenn wier abgiengen vnd nicht enwa^ern vnser erben noch niemant von vnsern wegen dem obgenanten gotshaus dhainen chrieg noch dhainen ierrsal schu^ellen tu^on wann die obgenanten zehent nach vns dem gotshaus ledig sint. Daz daz also sta^et vnd vnzebrochen beleib darvber so gib ich vorgenanter Dietreich der Maulhart vnd ich Chunrat der Maulhart paid pru^eder fu^er vns vnd fu^er vnser mu^eter den offen brief ze einem waren v^erchu^end versigelten mit vnser paider anhangundem jnsigel wol besta^etigt vnd ze einer pezzern gezeu^egnu^ezze vnd sicherhait mit dez erbern herren hern Eberhartz von Chapelle ze den zeiten hauptman ze Ens anhangunden jnsigel. Geben nach Christi gepu^erd dreutzehen hundert iar darnach in dem siben vnd f/enftzkistem iar an sand Lorentzen tag.

Source Fulltext: OÖUB 7 (Wien 1876) S. 522f., Nr. 515