Ich Seydel der Smid von Wesendorf Peter vnd Go^etfrid sein su^en veriehen offenleich mit dem brief allen den die in lesent sehent oder ho^ernt die nu sind oder chu^enftig werdent, daz vns der erber herr her Leutolt der Lerbu^echler chorherr datz sand Florian zu den zeiten chelner vnd siechmaister lazzen hat einen weingarten in der Wachaw der da haizzet Chelnerel also beschaidenleich, daz wir mit demselben weingarten nichtes nicht ze schaffen schu^ellen haben an dhainerlay sachen, nu^or daz wir in pawen schu^ellen mit vnsern phenningen so wir aller pest mu^egen an allen seinen schaden vnd daz ez dem gotzhaus datz sand Florian nutzz sei. gescha^ech dez niceht, so schol man den vorgenanten weingarten beschawen zwier in dem iar an sand Go^ergen tag vnd an sand Jacobs tag mit den nachtpawern als vil er der wil vnd die iem darzu^e geuallent, vnd ervintt man daz wir in versaumt haben mit dem paw oder indert verworlost, so schol sich der obgenant Leutolt oder wer die phleg datz sand Florian an seiner stat inne hat, dez obgenanten weingarten vnderwinden an allen clhieg vnd schu^ellen wir alle vnsreu recht die wir daran heten verloren haben, wier schu^ellen auch den obgenanten weingarten lesen vnd waz darinne wiert, daz schu^ellen wir antwu^orten in sein press, so schol er dann seinen poten haben ze weingarten vnd ze press da man ez vessent; vnd waz dez weins wiert, da schol er geleichen halben tail nemen vnd wier fu^er vnser mu^e halben tail von dem wier auch den zehent verrichten schu^ellen an alleu widerred. Auch schu^ellen wier ich Seyfrid vnd Peter vnd Go^etfrid sein su^en den oftgeschriben weingarten inne haben nu^or ze vnsern ta^egen vnd nicht lenger. wann fu^or (sic), daz wier ab gen, so ist er gantz vnd gar dem obgenanten herren Leutolten vnd dem gotshaus datz sand Florian ledig worden. Daz die rede sta^et vnd vnzebrochen beleib, darv^eber geb wier disen brief versigilten mit dez erbern mann insigel Chu^enratz von Wachawe vnd mit Nyclos dez Juden insigel ze den zeiten richter in dem Tal, wann wier selb aigner insigel nicht haben. Der brief ist geben nach Christi gepu^ord vber dreutzehen hundert iar darnach in dem acht vnd fumftzkistem iar an aller heiligen tag.

Source Fulltext: OÖUB 7 (Wien 1876) S. 600f., Nr. 589