Ich Chu^enigund die Chatzpekchinn vnd ich Nyclo der Hantmaister ier aidam ich Elspet sein hausfraw vnd all vnser erben veriehen vnd tu^on chunt allen den die den brief sehent ho^ernt oder lesent, daz wir mit gerichtes hant vnd mit aller sta^et recht vnd redleich gesatzzt haben herren Hainreichen auf der Gru^ob seiner hausfrawen vrawen Chu^enigunden vnd allen iern erben vnser haus, daz da leit zwischen Andres dez Veldner haus vnd der padstuben an dem V/erfar mit alle deu vnd darzu^o geho^ert, versu^echt vnd vnuersu^ocht vmb sechs vnd zwaintzig phunt wienner phenning, darvmb si ez von dem iuden geledigt habent, vnd zway phunt wienner phenning di wir in von demselben haus daz iar ze hofzins schu^ellen geben als hofzins recht ist. Wir schu^ellen auch seu derselben aecht vnd zwaintzig phunt phenning richten vnd weren auf sand Michels tag der schirst chu^emt. Tun wier dez nicht, so schu^ellen si daz egenant haus versetzzen verchauffen als verr daz si ierr vorgenanten phenning gantz vnd gar davon becho^ement. Gieng aber in daran icht ab, daz schullen si haben auf unsern trewen vnd darzu^o auf aller vnser hab swo wier die haben versu^ocht vnd vnuersu^ocht. Daz die rede sta^et vnd vnzebrochen beleib, darv^eber geben wier den brief versigilten mit dez obgenanten herren Hainreichs auf der Gru^ob ze den zeiten mauttner vnd richter datz Lintzz, mit herren Fridreichs dez Vngelter vnd mit herren Andres an dem V/erfar anhangunden jnsigeln, die di an habent gelegtt durch vnser pet willen ze einer gezeugnu^ezz in an schaden. Der brief ist geben nach Christi gepu^ord dreuzehen hundert iar vnd in dem a^echt vnd fu^emftzkistem iar an sand Gallen tag.

Source Fulltext: OÖUB 7 (Wien 1876) S. 598, Nr. 586