In nomine domini amen. Anno natiuitatis eiusdem millesimo trecentesimo quinquagesimo nono, duodecimo kalendas martii in speciali comodo prepositi domus sancti Floriani ordinis sancti Augustini canonicorum regularium Patauiensis dyocesis coram vobis venerabili domino Wygando predicte domus sancti Floriani preposito, ac in presencia vestrum religiosorum honorabilium et discretorum virorum hic personaliter presencium et presentibus subscriptorum et ad hoc specialiter per nos vocatorum et rogatorum Nos frater Nicolaus ordinis predicatorum dei ac sedis apostolice gracia episcopus Marcopolensis, quamuis debiles corpore sani tamen mente personaliter constituti desiderantes circa bonorum nostrorum omnium et singulorum tam mobilium quam inmobilium a deo nobis datorum nostris laboribus acquisitorum ordinacionem nec non vltimate nostre voluntatis disposicionem ineuitabile humane condicionis debitum preuenire, legitimurn et inmutabile testamentum, ab illustri principe domino Rudolfo duce Austrie ac a reuerendo patre domino Gotfrido episcopo Patauiensi, dominis nostris generosis, nec non ab omnibus et singulis Christi fidelibus perpetuo obseruandum et in Christi nomine defenderidum ac propter diuinam remuneracionem exequendum fideliter libere ac proprio motu sanaque racione facimus, et factum ac voluntatem nostram vltimam super et de ipsis omnibus et singulis in hiis scriptis pronunciamus, vt sequitur in hec verba. In primis ordinamus venerabili domino nostro Patauiensi episcopo predicto centum talenta denariorum wiennensium, pro quibus nobis est ab ipso decima in Manswerd obligata, et decem talenta denariorum ad sanctum Stephanum in Wyenna nobis pro reconciliacione cimiterii ibidem soluenda, et sex talenta de Hakenberch pro chori consecracione. Item ordinamus ad fabricam ecclesie Patauiensis quadraginta talenta denariorum wyennensium, in quibus nobis obligatur Vlricus Schinnpayn et pro quibus vina sua nomine nostro sunt arrestata. Item ordinamus cancellario domini ducis vnam subtilem aleam forte valentem triginta florenos vel amplius pro amicabili memoria. Item ordinamus domum nostram duplicatam in Wyenna in antiquo foro carnium sitam emptam pro centum et octoginta talenta denariorum wyennensium ad sanctum Florianum et ad sanctum Andream canonicorum regularium sancti Augustini ordinis predicte Patauiensis dyocesis simul in solidum ab ipsis tenendam. Item testamur et ordinamus pro vna missa cottidiana in altari sancti Achacii nove capelle capitularis ad sanctum Florianum perpetuo habenda, vbi literis presentibus eligimus sepulturam, vnam vineam in Aetzkendorf sitam an der Hohenwart, emptam pro triginta tribus talentis denariorum wyennensium, et vnam vineolam sitam an dem Chalnperg nominatam Fridflekch emptam pro octo talentis denariorum wyennensium, et tres equos nostros, et omnes anulos nostros pro vno calice, et vnum pannum sericeum nouum pro casula ad capellam sepulture nostre predicte. Item ordinamus canonicis sev dominis conuentualibus ibidem pro exequiis sepulture ac pro perpetuo anniuersario nostro ibidem celebrandis omnia vasa in ciffis sev picariis siue in quacunque alia forma et de quacunque materia existant preter meliorem ciffum argenteum, quem priorisse et preter picarium a domino duce nobis datum, quod V/esmaninne ad sanctum Laurencium in Wyenna, et preter coclearia argentea et vnum ciffulum argenteum nobis quondam a domino preposito sancti Floriani datum, que et quem eidem domino preposito testamur et legamus. Item ordinamus medietatem annone tam tritici quam auene et vnum vas vini ad sanctum Laurencium in Wyenna. Item ordinamus predicatoribus in Frisaco sex modios tritici reddituum annalium, nobis de Nideraltach obligatos pro octoginta talentis wyennensibus, sed solum redimendos pro sexaginta talentis defalcatis de principali summa viginti libris pro fructibus medio tempore a nobis perceptis, et viginti tria talenta wyennensia, in quibus iidem predicatores nobis obligantur, et omnes libros nostros preter vnum librum missalera et matutinalem quos ordinamus Heinrico capellano nostro, cui eciam testamur duo talenta reddituum in Nevnburga, et vnum vas vini et cappas ac tunicas et alias vestes nostras religiosas. Item ordinamus sorori nostre in Villaco quinquaginta florenos aureos in quibus predicatores in Frisaco predicti sunt nobis obligati. item avunculo sev famulo nostro Johanni ordinamus quatuor talenta reddituum in Perchtolczdorf et vnum vas vini. Item Vlrico famulo nostro vnum vas vini et tria talenta aquilegensium. Item procuratrici nostre tria talenta aquilegensia. Item famulo nostro vectorali duo talenta aquilegensia ordinamus. Item testamur Chunrado capellano Scho^ennaycharij medium talentum reddituum ex parte Hippelstorfer et pallium quod dedit nobis prepositus de sancto Floriano cum pellibus melioribus et vnum lectum plumaceum cum lectisterniis ad hoc spectantibus et vnum culcitrum sericeum. Item significamus quod prepositus de Aptzperch tenetur domine Grafenwerderinne in Minnpach viginti octo talenta denariorum wyennesium que sibi mutuauit mediante persona nostra. Item ordinamus predicatoribus in Levben viginti quatuor florenos in quibus sunt nobis obligati. Item prior in Gretz tenetur nobis sedecim florenos de quibus octo testamur eidem priori, alios vero octo lectori in Frisaco. Item liber quem habet prepositus sancti Ypoliti reddatur abbati in Chotwico, qui nobis ipsum accomodauit. Item peccuniam, quam nobis tenetur Leutoldus procurator sancti Ypoliti, ordinamus dominis canonicis ibidem. Item volumus et ordinamus, vt si que res alie in presenti scripto non nominate superessent, de hiis dominus Wygandvs prepositus supradictus plenam habeat pro missis et elemosinis ac aliis pro nostra et omnium fidelium animarum salute disponendi facultatem. Huiusmodi igitur testamenti nostri ac vltime et perpetue voluntatis nostre ordinamus et constituimus omni jure modo et forma quibus melius possumus et debemus et constitutos presentibus pronunciamus nostros veros et legitimos executores, quorum in hoc imploramus auxilium et consciencias in Christo oneramus, videlicet venerabiles dominos . . Scotorum in Wienna et . . Chotwicensem abbates ordinis sancti Benedicti ac honorabiles dominos . . plebanum in Wyenna predicte Patauiensis diocesis et magistrum . . . illustris ducis Austrie cancellarium, dantes eis et cuilibet eorum in solidum, ita quod non sit melior condicio occupantis, sed quod vnus eorum inceperit per alium vel alios valeat mediari et liniri, plenam et liberam facultatem, ordinacionem nostram supradictam in toto et in qualibet eius parte integralariter ut supradictum est exequendi, nec non legatarios et quemlibet eorum in corporalem possessionem legatorum mediante domini nostri generosi ducis Austrie supradicti auxilio nostro nomine ponendi et defendendi ac legata omnia et singula omnibus et singulis legatariis non habentibus assignandi ac omnia et singula, tamquam nos ipsi faciendi, per que presens testamentum nostrum effectum consequi possit et ad finem nostre intencionis suprascripte integraliter peruenire, nichil omnino neque in toto nec in parte circa predictam nostram voluntatem inmutando. In quorum, videlicet testamenti ordinacionis voluntatis et constitucionis ac omnium et singulorum predictorum euidens et perpetuum testimonium presentes fieri iussimus literas ac nostri nec non venerabilis domini Wygandi prepositi sancti Floriani sepedicti sigillorum appensione ac subscriptorum testium subscripcionibus testimonio ac presencia videlicet Stephani decani Heinrici custodis et Nicolai capellani, canonicorum regularium domus sancti Floriani supradicte et Heinrici nostri capellani ordinis predicatorum, Erhardi de Vronburga Salczburgensis, Ottakcheri de Traysenmawer plebanorum, et Andree dicti Nevnchircher de sancto Floriano presbiteri, Waltheri scriptoris coquine clerici, Johannis de Erndorf et Fridrici Holczeri laycorum Patauiensis dyocesium mandauimus roborari. Actum datum anno mense die et loco supradictis. ||
Ego Stephanus decanus sancti Floriani et canonicus Pataviensis dyocesis supra nominatus testamento ordinacionibus constitucionibus et mandatis ac omnibus et singulis supradictis vnacum predictis et subscriptis testibus cum fierent et agerentur presens interfui meaque propria manu presentibus subscripsi in testimonium omnium et singulorum premissorum. ||
Et ego Heinricus custos ordinis et ecclesie et dyocesis supradictorum in testimonium omnium et singulorum premissorum vna cum predictis et subscriptis testibus me subscribo. ||
Et ego Nycolaus capellanus canonicus ordinis ecclesie et dyocesis predictorum vna cum predictis et subscriptis testibus in testimonium omnium premissorum me subscribo. ||
Et ego Erhardus plebanus in Vro^enburga supradictus omnibus et singulis predictis vna cum dictis et subscriptis testibus interfui et in testimonium presentibus me subscribo.||
Et ego Ottakcharvs plebanus in Traysenmawer omnibus predictis vna cum predictis et subscriptis interfui et in testimonium omnium premissorum presentibus me subscribo.

Source Fulltext: OÖUB 7 (Wien 1876) S. 617ff., Nr. 610