Innocentius episcopus servus servorum dei dilectis filiis preposito et conventui monasterii sancti Floriani per prepositum soliti gubernari ordinis sancti Augustini Pataviensis diecesis salutem et apostolicam benedictionem. Cum a nobis petitur quod justum est et honestum, tam vigor equitatis quam ordo exigit rationis, ut id per solicitudinem officij nostri ad debitum perducatur effectum. Eapropter dilecti in domino filij vestris justis postulationibus grato concurrentes assensu omnes libertates et inmunitates a predecessoribus nostris romanis pontificibus sive per privilegia sive alias indulgentias nobis et monasterio vestro concessas nec non libertates et exemptiones secularium exactionum a regibus et principibus ac alijs Christi fidelibus racionabiliter vobis et monasterio predicto indultas, sicut ea omnia eas (sic) juste et pacifice obtinetis, vobis et per vos eidem monasterio auctoritate apostolica confirmamus et presentis scripti patrocinio conmunimus. Nulli ergo omnino hominum liceat hanc paginam nostre confirmationis infringere vel ei ausu temerario contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum ejus se noverit incursurum. Datum Avinione idibus decembris pontificatus nostri anno nono. R. de Armaniaco.

Source Fulltext: OÖUB 8 (Wien 1883) S. 50f., Nr. 49