Wir Rudolf von Gots gnaden hertzog ze Osterreich ze Steyr und ze Kernden etc. tu^en chunt, daz wir dem erbern und geistleichem probst Weiganten von sand Florians haus unserm lieben besundern chaplan durch der andacht und trewen willen die er ze uns hat und von besundern genaden erlaubet haben und erlauben auch mit disem brief ze jagen und ze vahen alle jar wie er mag zwen hierzzen, ainen an dem gepirig und einen bey der Trawn, alle di weil er lebtt und dez vorgenanten gotzhaus probst ist. Davon gepieten wir ernstleich unserm hauptman ob der Ens wer der ist und allen andern den diser brief gezaigt wiert, daz si den obgenanten probst bey derselben genad beleiben lazzen und dawider nicht ierren in dhainem weg. Mit urchund ditz briefs, geben ze sand Florian an sand Marie Magdalen tag nach Christes gepurd dreutzehen hundert jar darnach in dem zwai und sechtzkistera jar. + Hoc est verum. +

Source Fulltext: OÖUB 8 (Wien 1883) S. 90f., Nr. 89