Ich Chunrat der Maulhart purger ze Ens vergich, daz ich gelten schol Aran dem juden ze Ens, Saran seiner hawsvrawe und allen iren erben sechczich pfunt wienner pfenning, und fur diselben pfenning hau ich gesaczt an pfandes stat meinen hof genant der Chaltenperch gelegen in Florianer pfarr mit allen den nuczen und rechten, und ich in inne gehabt han und mit aller dew, und dar zu gehort mit alle den rechten, als wir in gehabt haben von dem erbern herren probst Weyganten datz sant Florian also mit ausgenommer red, daz ich vorgenanter Chunrat der Maulhart und mein erben schullen dem obgenanten Aron dem juden und sein erben den egenanten hof und waz darczu gehort richtig machen schol (sic) und auf geben schol mit herren hant, zu welher zeit er mich vodert in dem jar an gever. Tun ich dez nicht, swiegetanen schaden er oder sein erben dez nement, ez sei mit potschafft mit zerung mit nachraysen oder von andern sachen daz schad mag gehaizzen den ir ainer pey sein trewn an ayd wol gesprechen mag, den schol ich oder mein erben in gentzleich wider chern. Und dez zu einem sichtigen waren urchund gib ich obgenanter Chunrat der Maulhart und mein erben in den offen brief versigelten mit meinem anhangunden insigell und mit dez erbern mannes Fridreichs dez Weissen ze der zeit statrichter hie ze Ens anhangunden insigel der damit gezeug ist im an schaden. Geben, do man zalt von Christi geburd dreutzehenhundert und in dem tzway und sechzigsten jar dez nachsten sunntags vor sant Michels tag.

Source Fulltext: OÖUB 8 (Wien 1883) S. 99, Nr. 97