ICH Hartneyd der Chramer purger ze Wels und ich Peter der junge Heresinger purger ze Ens verjehe, daz wier Aron dem Judem ze Ens geu^erlaubtt haben den hof auf dem Chaltenperig genant hinzegeben mit allen den rechten und nu^etzen als er von alter hercho^emen ist und da man emaln hat dreizzig phenning von geraicht an sand Jo^ergen tag ze rechtem zins dem erbern herren probst Weiganten datz sand Florian und dem gotshaws do selbs also beschaidenleich, daz wier fu^erbaz darnach dhain ansprach nimmermer haben noch gewinnen schu^ellen wier noch alle unser erben. Daz in daz also sta^et und unverchert beleib, daru^eber so geb wier iem den offen brief versigelten mit meinem anhangundem insigel, und ze einer pezzern gezeugnu^ezz mit meins sweher Peter dez alten Heresinger anhangunden insigel, so verpint ich mich Peter der jung Heresinger under die egenanten zwai insigel alles daz sta^et ze behalten daz vor geschriben stet, wann ich aigens insigels nicht han. geben do man zalt von Christi gepu^ord dreutzehen hundert jar darnach in dem drew und sechtzkistem jar dez phintztages ze mittervasten.

Source Fulltext: OÖUB 8 (Wien 1883) S. 126, Nr. 121