Ich Jans der Wieschendorfer und all mein erben wir vergehen, daz wir ze chauffen haben geben dem ersamen herren probst Weyganten und dem gotshaus dacz sand Florian unser gu^etel genant dacz dem Do^erffein, daz weylent der Perchhaimer ist gewesen, gelegen in Chronsdorfer pharr daz unser vreiz aigen ist gewesen, umb sechs und zwainczik phunt alter wyenner phenning der wir gancz und gar gewert sein. Daz di red staet und unczebrochen beleib, daruber gib ich Jans der Wyeschendo^erfer den prief versigelten mit meinem anhangunden insigel, und ze einer pezzern zeugnuzz mit meines vetern Gebharts des Wyeschendo^erfer anhangundein insigel. Der prief ist geben nach Christes gepurd drewczehen hundert jar darnach in dem zway und sechczikisten jar an sand Niclas tag.

Source Fulltext: OÖUB 8 (Wien 1883) S. 114, Nr. 109