Ich Hertneid der Schikche purgraff ze Ens in der stat und lantrichter nyderhalb der Ens ich Chunigund sein hawsfrawe verjehen, daz wir recht und redleich ze chauffen haben geben dem erbern herren probst Weyganten von sant Florian unser haws und hoff gelegen ze Ens in der stat ze nachst pei dem habervelt tor umb viertzich pfunt wienner pfenning der wir von im gantz und gar verrichtt und gewert sein. Ich obgenanter Hertneid der Schikch und alle mein erben schullen und wellen dez vorgenanten haws und hof sein scherm und sein gewer sein jar und tag als ander purchrecht recht hat ze Ens in der stat. Und dez zu einem waren urchund gib ich obgenanter Hertneid der Schikch und mein erben im den offen brief versigelten mit meinem anhangunden insigel wolbestet, und mit dez erbern mannes Ulreichs dez Fumfchiricher zder zeit statrichter ze Ens anhangunden insigel. Geben, do man zalt von Christi geburd drewtzehenhundert jar an sant Larenczen tag dez heiligen martrer.

Source Fulltext: OÖUB 8 (Wien 1883) S. 149f., Nr. 143