ICH Eberhardt vonn Capelln herrn Hannsen sohnn von Capellnn dem Gott genadt unnd zu der zeitt haubtmann zu Enns unnd ich Eberhardt von Capell sein vetter herrn Ulreichs sohnn von Capelln dem auch Gott genadt, unnd mit unns all unnser erbenn wier verjechen, . . . dass wier . . . ze khauffenn haben geben dem gotshaus zu Pulgarn unnd dem gantzen convent daselbst trauen und herrnn den hoff zu Podendorff bey der Gusen unnd haist der Engkhelschalgkhhoff, unnd die Oberhueb auf dem Grass die baide gelegen sündt in Rieder pfarr, unnd das guet gehaissen ann dem Hochenberg da zu der zeitt Khuntzl darauf gesessen ist, unnd das da ligt in Steyreckher pfarr, unnd sündt alle freye aygen. also mit allen den rechten unnd nutzen haben wier inn die vorgenandten guetter gebenn alss wier sye selber innegehabt haben, es sey versuecht oder unversuecht, umb fünf unnd sybentzig pfundt wienner pfening, der wier gantz und gar gericht und gewert sein an allen schaden, unnd haben auch die vorgeschriben fünf und sybentzig pfundt pfening zu unnserm frumb anngelegt ann die herrschafft zw Valckhenberg. Wier haben auch vorgenanndte herrnn von Capell unnd all unser erbenn der vorgeschribenn guetter wider abzukhauffen und zu lösen all jar järlichen zwischenn ostern unnd pfingsten, unnd soll unns dan das obgenanndt gotshaus zu Pulgarn unnd der convent daselbs trauen unnd herrnn ann widerred die obgenandten guetter herwider zu khauffenn gebenn umb funf und sybentzigckh pfundt wienner pfening unnd umb nicht mehr. Darüber so geben wier innen den brieff versigilt mit unnsern innsigln, unnd ich vorgenandter Eberhardt von Capell herrn Ulriches von Capelln soelligen sohn verbündt mich mit mein treun aller der glübt unnd wandlung, als vorgeschriben stet ann dem brieff under des obgenanten meins vettern herrn Eberharts von Capell insigl, dan ich selber aygen innsigl nit gehabt zu derselben zeit. dess ist auch getzeug unser oheim herr Ott von Volckhenstorff von Khreutzen mit seinem innsigl, unnd herr Sighart der Grueber von Lufftenberg und Andre Perckhhaimer der zeitt purgkhgraff zu Steyreckh mit ieren anhangundten insigeln. Der brieff ist geben da man zalt von Cristy gebuert 1367igsten am tag Maria Magthalenna der heiligen frauen.

Source Fulltext: OÖUB 8 (Wien 1883) S. 332f., Nr. 340