Ich Wilhalm der Chersperger und mein hawsvrowe frowe Anna und all unser erben wir verjehen, daz wir unsers freyen aygens einen halben hof genant der Maulhartz hof gelegen in Hofchircher pharr gegeben haben den erbern geistleichen herren dem .. abt und dem convent dacz Glu^enich auf daz siechaw^es mit allen den nu^eczen und rechten die darzue geho^ernt fu^er fu^enftzehen pfunt wienner pfenning zu einem ewigen seigera^et also beschaidenlich, daz mier nach meinem to^ed und meiner hausvrowen und andern meinen erben und vorvadern saeligen ein jartag begangen werd mit gelewtt mit einer gemainen gesungen vigili dez abencz und mit einer gemainen gesungen selmezz margens und mit zwayn gesprochen messen, dobey mit aufgerichter par mit tuech mit zwelf cherzen alz sitleich und gewondleich ist, da van der siechmaister der den vorgenanten halben hof inne hat dem convent raichen und geben sol sechs schilling pfenning, und den priesteren die di drey mess habent yedem priester vier pfenning und dem guster van tuech und van chertzen zwen und dreizig pfenning. Waer aber daz ich oder mein erben den vorgenanten herren ein freyes aygen umb funfczehen pfunt pfenning chawften oder ein ander gut daz van den erbern edlen herren van Volchenstarf lehen ist, das sullen si selb auz richten und sullen wier in dez helfen an gevaer alz van dem halben hof geschriben stet, und sullen wier in daz antwuerten auf daz siechaw^es mit allen den nu^eczen und rechten di dar zu^e geho^ernt. Wenn daz geschiecht, so sullen dann die egenanten herren gegen dem varbenauten halben hof dehain ansprach nicht haben. Und daz die red staet und unverchert beleib, daruber gehen wier in den offen prief versigeltes (sic) mit meinem des vargenanten Wilhalmz des Chersperger anhangunden insigels. Und zu einer pesseren getzewgnu^ezz der sach mit meines vetern Heinreichs des Chersperger und mit des erbern chnechtes Otten des Stadloer bayder anhangunden insigeln wol bestaetigt. Der prief geben ist do van Christes gepu^erd waren ergangen drewtzehen hundert jar darnach in dem siben und sechtzigisten jar an aller heiligen tag.

Source Fulltext: OÖUB 8 (Wien 1883) S. 343, Nr. 352