ICH Hans von Poesenpeug Otten saeligen su^on und ich Christein sein hausfraw^o und mit uns all unser erben wir verjehen, daz wier zu chau^offen haben gebn dreu^o gu^ot gelegen in Altenpu^orger pfarr, deu^o zwai genant auf dem Geirsperg daz drit genant auf dem Pu^ohel und ain halbs gu^ot genant an dem Starcze in Pirichpecher pfarr und sind alleu^o geltz dritthalb pfu^ont wienner phenning ininner zehen phenning deu^o alleu^o vreyes aygen sind, mit allen rechten und nu^eczen und zu den gu^oten gehoert, hern Petern dem pfarrer ze Pabenneunchirichen und Marcharten dem richter daselb und Pilgreim dem zechmaister zu der vorgenanten chirhen in daz liecht, umb vierczk phu^ont wienner phenning der wier gericht sein zu rechter zeit also, daz seu^o di gu^ot schullen furbaz innehaben und niezzen mit alln rechten und nu^etzen alz ander aigen recht hat im lant zu Osterreich. Wier sein auch der gu^oter dez vorgenanten gotzhau^os recht geweren und verantburter fur all ansprach. Wer auch chu^omt von der vorgenanten chirhen wegen und uns manet mit dem gegnbu^ertigen prief, dem sei wier aller der gelub gepunden deu^o vor geschriben stent. Daz bestetig ich vorgenanter Hans fur mich und all mein nachchomen mit meim anhangundem insigel und verpinden uns au^och under unsers genedign hern insigel hern Eberhartes von Chappell im an wart und an schaden. Auch sind gezeug mit iern insigeln Dietreich der Wetzel und Peter der richter von Zell. Daz ist geschehen nach unsers hern gepurd dreu^ozehen hunndert jar darnach in dem zwai und sybenczkisten jar an sand Lucie tag.

Source Fulltext: OÖUB 8 (Wien 1883) S. 625, Nr. 623