WIR Albrecht von Gottes genaden pischoff zu Passau verjechenn füer unns unnd all unnser nachkhomben, das wier nach rath unnd mit gunst und willen unsers ehrwuerdigen capitls zu Passau zu ainem widerwechsl unnd inn rechts wechsls weis gebenn haben unnd geben auch wissentlich mit dem brief dem edlen ersamen Eberhartn von Capelln dem eltern die zeit haubtmann zu Enns Hannsen stelligen sohn von Capelln dem Gott genadt, unnd Eberhartten von Capelln dem jüngern Ulreichs soelligen sohn von Capelln dem auch Gott genadt, unnd allenn ieren erbenn unnser und unsers gottshauss rechten aygenns das kürchlechen zu Steireckh gelegenn inn unnserm pistumb zu Passau gegen und umb das khürchlechen zu Hädreins gelegen auch inn demselben unnserm pistum, das sy unns unnd unnserm gottshauss unnd allen unnsern nachkhomben dawider in rechts wahren wechsels weis redlich gegeben haben, so der brieff lautt unnd sagt den sy unns darüber geben haben also beschaidtenlich, das die vorgenanten Eberhart der elter Eberhart der jünger von Capelln unnd alle iere nachkhomben dasselb khürchlechen zu Steireckh fürbass freilich hanndln unnd nutzen und uns unnd unnsern nachkhomen zu derselben khürchen zu Steyreckh einen senten und presentirn so redlich ist, wann unnd alss offt die ledig wiert hinfüer ebigclich ann allen irrsall. Wier unnd all unser nachkhomben sein auch des ehegenanten khürchlechens zue Steyreckh ier recht gwer unnd scherm füer all annsprach allss khürchlechens unnd aygens recht ist. Wär aber das sy ann demselben khürchlechen icht khrieg oder ansprach gewunen, von wem das wär mit recht was sy des schaden nement, das sollen wier in alles aus¬richten unnd widerkheren ohn allen iren schadenn, unnd sollen sy das haben zu uns und zw unnsern nachkhomben unnd dartzue auf allem unnserm unnd unnsers gottshauss guett wo das gelegen ist. So ist besonnderlich zu merckhen, das die obgenanndt khürchen zu Steyreckh uns unnd allen unnsern nachkhomben bischoffen zu Passau und unnserm capitl daselbs ob je zu den zeittenn nicht pischoff wär, mit den stuellpfening die von allter darauf ligent unnd mit aller gehorsamb dennoch hinfüer ebigkhlich schlechtlich unnd getreulich soll unnderthänig und gehorsamb sein, alss unns und unnserm gottshauss die stuellpfening eher järlichen davon raichen unnd geben sündt unnd alss annder solch pfarrkhürchen inn demselben unnserm pistumb unns unnd unnserm gottshauss unnsern nachkhomen und unserm capitl ob nicht pischoff wär zu gehorsam und underthänigkhait nach ordnung geistlicher rechten rechtlich unnd gewöndlich sündt schultig unnd gebundten ohnn alles gevär. Unnd das die sach unntzerbrochen bleibe, darüber geben wier inn den brieff besigellt mit unnserm unnd mit des obgenanndten ehrwüerdigen capitls zu Passau annhanngundten innsygl, die ier innsigll zu zeugkhnuss unnd zu bestättung der obgeschribnen sachen unnd hanndlung an den brieff gehangen habenn jedoch an ieres capitls hab schaden. Geben zu Passaw am erichtag inn der osterwochenn nach Cristy gebuerdt dreytzehen hundert unnd darnach inn dem vierundtsybentzigisten jahren.

Source Fulltext: OÖUB 8 (Wien 1883) S. 690f., Nr. 682