Ich Hans der Losperger Jann sun dez Losperger, mein Hausrvaw vnd all vnser erben, wi^er voriechen vnd tuen chund allen den, dij den prief sehent oder horent lesen, Daz wi^er daz guet, daz da haizzet dacz dem channest vnd ist auch Lechen von dem Gotzhaus czu sant florian, erlangt vnd erchauft haben vnd iz auch genumen haben von dem gotzhaus also beschaydenleich, daz ich vnd all mein erben oder wer daz haus in hat, all iar an sant Florianstag ia^erleich geben schol czu czins czehen phenning gebiger wienner, tet ich oder wer daz haus in hat dez nicht, der schol aller der vell gepunden sein, di sy habent auf andern i^eren guetern, dij dem gotzhaus czinsheftig sein vnd schullen si der selbigen vell vnd czins bechomen dacz mi^er vnd dacz aller meiner hab oder dacz dem, der daz haus in hat, wo wi^er dij haben oder gewunnen mit vnserm guetleichem willen an oder mit recht, so si nachst chunnen oder mugen vnd da schol ich noch niemant wider reden noch tuen. Daz dij wandlung alfo stet vnd vnuerchert beleib, dar vber gib ich der obgenante hans der Losperger den prief versigelt mit meim anhangunden insigel vnd czu pezzer sicherhayt vnd geczeugnuzz mit meins prueder Leutoldz dez Losperger vnd mit dez erberen mans herren u^elreichz dez von Liechtenek czu der czeit haupman czu der Vreinstat vnd hansen dez Losperger meinez vetern anhangunden insigiln, dij ich dar vmb vleizzichlich gepeten han, daz si i^erew insigel daran gehangen habent in an schaden. Der prieff ist geben nach christi gepurd drevczehen hvndert iar, darnach in dem siben vnd sibenczigisten iar an sand Michelz tag.

Source Fulltext: OÖUB 9 (Wien 1906) S. 329-330