Ich Erasm der Pernawer vnd all mein eriben veriehen mit dem brief vnd tuen chund allen den die in sehent, ho^ernt oder lesent, die nu sint oder noch chunftig werdent, Daz wi^er mit wolbedachtem muet vnd mit gu^etem willen vnser nagsten vreunt, zue der czeit do wi^er ez wol getuen mochten Recht vnd redleich ze chauffen haben geben vnserm lieben Swager Hern Erckengern dem Mosinger vnd allen seinen eriben vnsern Hof gelegen in dem Swainpach vnd ain Seld da bey der vreys aygen ist mit sampt der seld vnd ainen Hof ze winckel ob Rorbach genant der voder Hof vnd ain seld da bei der lehen ist mit sampt der seld von dem Erwirdigen Goczhaws ze Pazzaw vnd alle gelegen sint in sand Florian pharr vnd die mein va^eterleich erib gewesen sind vnd mich mit rechtem tail angeuallen sint, da ich mit meinen geswistreten getailt han, daz haben wir in geben mit aller zuegehorung auz vnser nu^ecz vnd gewer in ir nucz vnd gewer vnd an alles geuer vmb czwai Hundert pfunt wiener pfenning, der wi^er von in gancz vnd gar verricht vnd gewert sein ze rechten tegen an all schaden. Vnd haben in die geben mit allen eren, nuczen vnd rechten, die zue den ob genantten guetern geho^ernt ze Holcz, ze veld, ze waid, ze wazzer, ze wisma^ed gestift vnd vngestift gepaw^en vnd vngepaw^en, versuecht vnd vnuersuecht wie so daz genant ist vnd von alter her chomen ist. Jch obgenantter Erasm der Pernawer vnd all mein eriben schullen vnd wellen der vorgenantten gueter aller i^er gewer vnd furstand sein fu^er all ansprach, wo in dez not vnd durft geschiecht dez aygens alz aygens recht ist, dez Lehens alz lehens recht ist ze Hoftaiding, vnd ze Landtaiding nach Lancz recht ze Österreich ob der Enns. Wer aber daz in an der gewerschaft icht abgieng, von wem daz wer oder wie sich daz füeget von der obgenanten gueter wegen, daz schullen wi^er in alles auz richten an aller ir scheden, wann si vns dar vmb vodernt, vmb alles daz daz oben an dem brief geschriben stet. Tuen wir dez nicht wie getanen schaden si denn dez nement den ir ains bei seinen trew^en gesprechen mocht an aid vngesworn vnd vngerecht, die selben scha^eden schu^ellen wi^er in ablegen vnd ga^enczleich wider chern vnd schullen si daz alles haben auf vns vnd auf vnsern trewn vnd dar zue auf aller vnserer Hab wo wir die haben wie die genant ist versuecht vnd vnuersuecht, wir sein Lebentig oder tod, vnd schullen sie dez da uon bechomen an chlag vnd an recht mit vnserm guetleichen willen vnd (an) alle irrung, vnd schullen wi^er sew noch nyemant von vnsern wegen daran mit nichte irren noch wider sein, daz geloben wir in mit vnsern trewn alles stet ze haben vnd ze volfuren, vnd wer auch den brief inn hat vnd fu^erbringt, der hat alle die recht die oben an dem brief geschriben stent vnd dez zue einem sichtigen warn vrchund vnd czewg der warhait geben wir in ich obgenanter Erasem der Pernawer vnd all mein eriben den offen brief versigelt vnd wolbestet mit meinem anhangunden Jnsigel vnd mit meins lieben Prueder Jochleins dez Pernawer vnd mit meines lieben O^ehaims Hainreichs dez Harthaymer vnd mit meins lieben Ohaims||
Wilhalms dez Grueb(er) allen drin anhangunden Jnsigeln, Vnd zue einer pezzern sicherait vnd waren zeugnuze mit Gotschaliches dez Lerbuler anhangunden Jnsigel der ez dar an gehangen hat durch vnser vleizzig pet willen im vnd seinen eriben an schaden, wann der obgenante chauff vnd die sach mit der obgenantten aller dreier meins lieben Prueder Jochleins des Pernawer vnd vnsers lieben Ohaims Hainreich dez Harthaimer vnd vnserr (!)||
lieben Ohaims Wilhalms dez Grueber gunst vnd gueten willen geschechen ist. Der brief ist geben nach Christi gepurt drewczehen Hundert Jare vnd in dem Acht vnd Sibenczikisten Jare dez nagsten Suntags vor sand Ambrosij tag.

Source Fulltext: OÖUB 9 (Wien 1906) S. 413-415