Wir Albrecht von Gotes gnaden Probst dacz sand Florian veriehen —, daz wir Fridrich dem Chrewzz von Radendorf Margreten seiner Hawsfraw^en Vlreich dez Weintaler tochter mit vnsers Conent (!) willen lazzen haben den Hof dacz Radendorf vnd daz Gertel da bei, vnd die prezz vnd czwai Jewch weingarten daz alles gehort in vnserr Gusterampt dacz sand Florian, Also beschaidenleich daz sie alle iar dem Guster vnsers Gotzhaws dauon dienen vnd geben schullen an sand Michels tag drey schillingen wienner phenning vnd czehen emer weins vnd vier vnd czwainczick pfenning ze purchrecht. Si schullen auch warttent vnd gepunden sein, alz ander vnser Holden dacz Radendorf vnd schullen auch den Hof vnd waz si habent von vnserm Gotzhaws bei gueten mittern paw behalten. Si mugen noch schullen auch daz recht, daz sie ze i^ern tegen alein habent, weder verseczen noch verchauffen an vnsern willen vnd gunst. Vber giengen sie des yndert ains daz ein chundschaft wurd, so sind sie von irn rechten, die sie dar an gehabt habent, Vnd wann sie abgent mit dem tod, so ist vns ledig warden, waz sie gehabt habent von vnserm Goczhaws. daz die wandelung also stet beleib, Geben wi^er in den brief versigelt mit vnserm anhangunden Jnsigel. Der geben ist nach Christi gepurt drewczehen Hundert Jar vnd in dem acht vnd Sibenczikisten Jare an vnser Frawn tag zue der Liechtmezze.

Source Fulltext: OÖUB 9 (Wien 1906) S. 381