Ich Perichdunch der Chressling vnd mein Hausuraw vnd all vnser erben veriehen offenleich mit dem prief vnd tu^en chunt allen den dy in sehent, hörent oder lesent, das wi^er mit wolbedachtem mu^et vnd nach rat vnd weysen vnser na^echsten vnd pestenn frewnt dy zeit do wi^er es mit recht wol getu^en machten, Recht vnd redleich versaczt haben meinem lieben swager Gebhartenn dem Marbekchen vnd seiner Hausurawn Dorothen vnd allen i^eren Erben Vnsern Hof genant dacz dem Holcz vnd dy Hofstat da pey gelegen in sand Jöriger phar vnd dy rechts vreys aygen sind, mit allen eren nu^eczen vnd rechten dy dar zu^e gehörent ze holcz, ze Veld, ze wayd, ze wazzer vnd ze wismad, gepawn vnd vngepawn, gestifft vnd vngestifft oder wie ein igleich dinch genant ist versu^echt vnd vnuersu^echt vnd als wi^er dye selben inne gehabt haben, vnd als sew von alter her chömen sind, aws vnser nutz vnd gewer in i^er nucz vnd gewer, Vmb Sechczk phunt wienner phenning dy sew vns durch gu^eter trew vnd fu^edrung willen berait gelichen habent. Wi^er vnd all vnser Erben haben auch vreye wal den obgenanten Hof vnd dy Hofstat mit aller zu^egerung (!) von in her wider ze lo^esen vmb dy obgenanten Sechczk phunt phenning alle Jar Jar Järleich (!) acht tag vor vnser vrawn tag zder Liechtmezz vnd acht tag hin nach vnd schvllen sew vns der selben Losung mit nichte wider sein. Vnd wenn das ist das sew ires obgenanten gelts nicht lenger enpern noch geraten mu^egen oder wellent, So schu^ellen sew vns Lo^esung an pieten vor ze weinachten. Lo^esen wir denn nicht zu der na^echsten Löstzeit dar nach, So mu^egen sy den obgenannten Hof vnd Hofstat mit aller zügeho^erung vmb i^er obgenante gelt verseczen wem sy wellent an all vnser irrung vnd mit vnserm gu^etleichen willen. Wir vnd all vnser erben schüllen auch des obgenanten Hofes vnd Hofstat mit aller zu^egehörung vnd auch des Satzes i^er recht gewern vnd fu^erstant sein an aller stat, do in des not vnd dürft geschicht als saczes vnd vreys aygens recht ist in dem Land ob der Enns. ging in aber dar an icht ab mit recht, wie getan scha^eden sy denn des na^emen, dy ir ains pei seinen trewn gesprechen möcht an ayd vngesworn vnd an recht dy selben schäden schüllen wir in mit sampt dem obgenanten Haubtgu^et gancz vnd gar ab legen vnd wider chern, Vnd schüllen sew das alles haben auf vns vnd auf vnsern trewn vnd dar zu^e auf aller vnser Hab wo wi^er dy haben auf wazzer auf land inner lantz versu^echt vnd vnuersu^echt, Vnd mu^egen sew des alles do von becho^emen an chlag vnd an recht mit vnserm gu^etleichen willen. Vnd schu^ellen wi^er sew noch ny^emant von vnsern wegen dar an mit nichte i^erren noch wider sein. Vnd des alles zu ainem waren vnd stäten v^erchunt geben wi^er in den prief versigelten vnd wol besta^ett mit meinem obgenanten Perichdunchs des Chressling anhangundem Jnsigel, Vnd mit meiner lieben swa^eger Akcherleins vnd Vlreichs der Holczer paiden anhangunden Jnsigeln mit der gunst vnd gu^etem willen der satz vnd dy Handlung geschehen ist. Vnd zu ainer waren zewgnuzz mit der erbern Andres des Perkchaimer vnd Fridreichs des Holtzer paiden anhangunden Jnsigeln dy da mit zewgen sind durch vnser vleizzigen pet willen in paiden vnd iren erben an schaden. Der prief ist geben nach Christi gepürd vber drewczehen Hundert Jar vnd in dem Achczkisten Jar an sand Antonij tag.

Source Fulltext: OÖUB 9 (Wien 1906) S. 783-785