Ich Marchart der pech vnd ich Margred sein Hausfraw vnd all vnser paider erben vergehen offenleich mit dem Brif vnd tün chunt allen den di yn sehent oder hörnt lesen, daz wir mit wolbedachtem müt, vnd zu der zeit da wir ez mit recht wol getün machten recht vnd redleich ze chauffen haben geben iansen dem Pechen vnd vrawn Margreten seiner Hausfrawn vnd iren paiden erben vnsern weingarten der da haist di Schut vnd leit zu nost Chunrats dez Praschen weingarten der da haist dew Slacht, den vorgenanten weingarten hab wir in geben vmb drey zehend halb phunt phenning wienner munzz der wir gancz vnd gar verricht vnd gewert sein zu rechten taegen mit allen den nuczen, rechten vnd eren vnd da zue gehört, versücht vnd vnuersücht vnd auch mit perchherren hant Fridreichs dez Pernaer, dem man da von geit ainen phenning ze pürchrecht all iar an sand Michels tag in sein Lehen, Also beschaidenleich daz sew hinfür allen iren frvm damit mo^egen geschaffen mit verseczen vnd verchauffen oder geben, Swem sew wellen an allew irrvng, waer auch daz sew mit recht dar vmb icht angi^eng, welicherlai daz waer, daz schullen wir in als aws an all ir mue vnd dez sey wir ir recht Scherm vnd gwer für allew ansprach als pürchrechts Scherms recht ist, vnd dez Landes recht in Österreich, vnd was in daran abget, daz schullen sew haben dacz vns vnd dacz aller der Hab di wir haben in dem Lande zu Österreich, wir sein lemtich oder töd vnd wann wir nach (!) der vorgenante perchherr nicht aigner insigl gehabpt haben, dez hab wir fleizzichleich gepeten di erbern Chu^enraten den flander von Wesendorf vnd niclasen den Jud von wachaw daz sew der sach zewg sind mit iren anhangunden insigeln in paiden an Schaden. Geben nach Christi gepurd drewzechen Hundert iar dar nach in dem achczkisten iar an sand Valteins Tag.

Source Fulltext: OÖUB 9 (Wien 1906) S. 774-775