Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tirol etc. embietten vnserm lieben getrewn Reynprechten von Walsse oder swer ye vnser hauptman ob der Ens ist, vnser gnad vnd alles gut. Wir emphelhen dir mit dem gegenwurtigen prief ernstleichen vnd wellen, daz du dir die erbern vnd geistlichen vnser lieben andechtigen in Got den probst vnd den conuent vnd auch das goczhaus zu sand Florian lassest empholhen sein vnd si auf alle ire leut vnd güter vestiklichen beschirmest von vnsern wegen vor allem gewalt vnd vnrechten vnd besunderleichen auf dem gericht, das yn die Volkenstorffer zu chrieg tunt, da halt vnd beschirm si pey auf das recht, als si das von alter habent herpracht vnd nach sag der prief, vnd dem goczhaus von vnsern voruordern daruber gegeben sind, wan wir das gar ernstleichen also mainen. Mit vrchund dicz priefs geben ze Lincz an sand Florians tag nach Christes geburt dreuczehenhundert jaren darnach in dem fumf vnd achczigistem jare.

Source Fulltext: OÖUB 10 (Wien 1933) S. 324