Bonifacius episcopus seruus seruorum dei, dilectis filijs preposito et conuentui monasterij sancti Floriani de sancto Floriano per prepositum soliti gubernari ordinis sancti Augustini Patauiensis diocesis salutem et apostolicam benedictionem. Sincere deuotionis affectus, quem ad nos et Romanam geritis ecclesiam, promeretur, ut uotis uestris illis presertim, que commodum et utilitatem uestri monasterij respiciunt, quantum cum deo possumus, fauorabiliter annuamus. Dudum siquidem pro parte uestra nobis exposito, quod licet olim in Vecklapruck cum hospitali pauperum sibi annexo et in Ryed ac in Waldchirchen Patauiensis diocesis parrochiales ecclesie, que de iure patronatus eiusdem monasterij existebant prout existunt, prefato monasterio ex certis rationabilibus causis auctoritate ordinaria incorporate forent, tamen incorporationes ipse siue per uestram siue per aliquorum predecessorum uestrorum in eodem monasterio negligentiam seu alias interrupte dicebantur uosque etiam dubitabatis incorporationes ipsas ex certis causis iuribus non subsistere, ac pro parte uestra nobis humiliter supplicato, ut easdem ecclesias predicto monasterio de nouo annectere unire et incorporare de speciali gratia dignaremur, nos, ut incumbentia uobis onera magis accommode supportare possetis, de alicuius subventionis auxilio uobis prouidere uolentes prefatas ecclesias cum omnibus iuribus et pertinentijs suis eidem monasterio auctoritate apostolica imperpetuum incorporauimus annexuimus et uniuimus ita, quod decedentibus predictarum ecclesiarum rectoribus uel alias ecclesias ipsas quomodolibet dimittentibus liceret uobis corporalem possessionem earundem ecclesiarum libere apprehendere et retinere omnesque fructus redditus et prouentus ecclesiarum predictarum in supportationem onerum huiusmodi et usus uestros conuertere diocesani loci et cuiuslibet alterius licentia super hoc minime requisita, ita tamen, quod diuinus cultus in eisdem ecclesijs propterea non minueretur quodque etiam ecclesias ipsas et curam animarum et parrochianorum earundem per ydoneos canonicos eiusdem monasterij ad solum nutum prepositi pro tempore dicti monasterij per prepositum soliti gubernari ponendos et canonicos ipsos ad claustrum eiusdem monasterij reuocandos et alias amouendos regi fauere ac episcopalia iura soluere et alia onera rectoribus pro tempore ipsarum ecclesiarum et earundem ecclesiarum occasione incumbentia in omnibus teneremini supportare, prout in nostris inde confectis litteris plenius continetur. Cum autem, sicut exhibita nobis nuper pro parte uestra petitio continebat, dilecti filij Nicolaus in Vecklapruck cum hospitali huiusmodi sibi annexo et Martinus in Ryed ac Crisogonus in Waldchirchen ecclesiarum predictarum rectores ex certis rationabilibus causis et ad finem, ut uniones annexiones et incorporationes huiusmodi celerius et efficacius sortiantur effectum, quilibet uidelicet eorum sue ex ecclesijs predictis, quam obtinet, ea tamen conditione, quod^a) singulis rectoribus eisdem de fructibus redditibus et prouentibus predicti monasterij singule congrue portiones, de quibus, quoad uixerint, ualeant congrue sustentari, per uos assignentur, libere ac sponte cedere proponant, nos uotis eorundem rectorum in hac parte fauorabiliter annuentes uestris in hac parte supplicationibus inclinati uobis cessiones huiusmodi a pretatis rectoribus uel procuratoribus suis ad hoc ab eis specialiter constitutis, si illas in uestris manibus libere ac sponte facere uoluerint, ut profertur. Dummodo ex parte uestra uel rectorum predictorum aut alias nulla in hijs prauitas interueniat seu etiam corruptela, auctoritate predicta recipiendi et admittendi ac alia circa premissa necessaria faciendi ipsisque cessionibus sic receptis et admissis ac singulis congruis portior ibus huiusmodi de fructibus redditibus et prouentibus predictis singulis ex rectoribus prefatis, de quibus, ut prefertur, quoad uixerint, ualeant congrue sustentari, per uos assignatis corporalem earundem ecclesiarum possessionem iuxta predictarum continentiam litterarum libere apprehendendi ac licite retinendi omnesque fructus ecclesiarum predictarum in supportationem onerum huiusmodi et usus uestros conuertendi cuiuscunque licentia super hijs minime requisita plenam et liberam concedimus tenore presentium facultatem (eo) prouiso, quod ecclesie predicte debitis non fraudentur obsequijs et animarum cura in eis nullatenus negligatur. Datum Rome apud sanctum Petrum V. Kl. Nouembris pontificatus nostri anno sexto.

Source Fulltext: OÖUB 11 (Wien 1983) S. 439-442