Ich Eberhart von Kapellen vergich für mich vnd mein erben vnd tun kunt offenlich mit dem prief vmb daz gut ze Praytprunn, da der Rawscher auf gesessen ist, vnd den zehent auf dem guet ze Praytprunn, da der jung Struczel aufgesessen ist, payde gelegen in Hersinger pharr mit irrer zugehorung, dy vor mit der lehenschafft in mein herschafft vnd zu der vesst Churnwerch gehört hat, vnd dy Christan der Schyekk mein dyener vor von mir ze lehen gehabt hat, daz ich demselben meim dyener Kristan di genad tan hab vnd hab im vnd allen seinen erben vnd gaben das obgenant gut vnd zehent mit irrer zugehorung geaigent vnd dy lehenschafft, so ich darauf gehabt hab, gegeben vnd gib vnd aygen in dy wissentlich mit dem brief also, daz ich noch mein erben hincz der lehenschafft, so ich auf dem obgenanten gut vnd zehent gehatt hab, chain zuspruch nymmermer haben noch gewinnen sull noch well^a) in dhainerlay weiz vnd mugen auch sy mit dem obgenanten gut vnd zehent mit irrer zugehörung hinfur allem an frümen schaffen, wy in daz aller pest fugt, als mit anderm irm aygen haften guet. Mit vrkund des brieffs versigelt mit meinem anhangundem insigel. Der brief ist geben, do man zalt von Kristi gepurd tawsent iar drewhundert jar darnach im acht vndnewnczikisten iar an Vreytag nach dem heyligen Auffart tag.

Source Fulltext: OÖUB 11 (Wien 1983) S. 697