Ich Popp von Liebenberch vnd min chon Frowe Offmey tv^en chvnt mitsampt vnseren Svnen beiden Poppen vnd Engelprehten allen den, di nv sint vnd heR nach chvmftich werdent vnd die disen brief lesent oder horent lesent, daz frowe Magdalen volchmares chon gegen frowen Jevten der Prevmaisterin von Passowe gechlaget hat vmb einen weingarten, der leit an dem Aychweg vnd haizzet deR GeR, vnd iach rehtz dagegen also verre, daz div vorgenant frowe Jevte fuR fRiderichen vnseren Perchmaister chom vnd verantwrt den vorgenanten weingarten mit vorsprechen vnd verantwrt in so verre, daz div vorgenant Jevte mit vrag vnd mit vrtail vnd mit Ayden deR vorgenanten frowen Magdalen Reht vnd Redlichen enbraest vnd allen ir Erben von rehtem geriht vnd ward avch deR vorgenanten Jevten iR vnd ir Erben Rw ertailet vmb die vorgenanten ansprach. Daz disiv sache furbaz stet beleib vnd vnzebrochen, da gib ich Popp mitsampt miner chonen fRowen Offmeyn vnd mit vnseren Svnen, die vorgenant sint, vnser Insigel zv^e einem vrchvnd. DiseR sach ist geczivch heR Chol der Amman, heR Friderich der hvtstoch, heR wernhart deR Schiver, daz sint. Reiter; Gerunch heren cholen svn, der jvng Gerbot, WaltheR der Zevner, Dietrich deR Retzer, Jacob der vorster, Perhtolt deR Mvlner, Pilgreim der vleischacher, Livbel der Smid, Chvnrat der hovbtlachner, Livpolt deR Amman, Ortwin der Marchekker, Weichart, Otto der Schondorfer, Sifrid der Schriber, Otto der Chrevtzer, Perhtolt deR Dorfhvter, HeinRich dorfhvter, Otto von Challenperg, Polczel vnd Rvschel sin pruder, Perhtolt heren Gerbotes svn, Dietel Zistel, fridel heczman, Janso, Dietrich paster, Heinrich, Fridel der Drilefs, Ch. der Olm vnd ander Levt genv^eg. DiseR brief ist gegeben hie ze Nevnburch von christes gebvrt Tovsent zway hvndert Nevnczich vnd Sehs Jar an Sant Agnes tage der magde.

Source Fulltext: OÖUB 4 (Wien 1867) S. 233-234, Nr. 259