Ich Herman ymian genant Rihter ze den ziten vnd wir der Rat mitsampt der Gemeine der Stat ze Herczogen-Nevnburch vergehen offenchleich vnd tv°n ze erchennen allen den, di disen prief anesehent lesent oder ho^erent lesen, die nv lebent vnd hernah chv^enftich sint, daz Chv°nrates svn des Stelczer von Pazzowe Chv°nrat des Prevmeister Eninchel chom fu^er friderichen an dem Gasteige des Liebenberger Perchmeister vnd vordert im vnd siner Swester reht daz virteil an dem wingarten an dem Aichwege, der wilen des Prevmeister was, der selbe wingart waer im vnd siner Swester ze rehte ledich waren von ir enn vnd auch von ir ann, vnd chom fu^er Gervngen hern Choln svn vnd vordert sin reht vnd siner Swester reht von der Hofstat an dem Gasteige, div auch wiler des Prevmeisters was, als er an dem wingarten gevordert het. Chom Engelschalch der Stadler an siner hv^esfrowen stat frowen Elspethen, div des Prevmeister tohter ist, vnd Chv°nrat Hosmvnt an siner Hv°sfrowen stat frowen alheiten, div auch des Prevmeister tohter ist, vnd antwrten Chv°nraten vnd siner Swester vnd ebenten sich auch mit in nah biderber vnd nach Erbaer levte rat vnd gaben in drev fu°der wines vnd zwei pfunt phenning fu^er allez daz reht, daz si rv°gten vnd gehabt heten an dem vorgenanten wingarten, vnd vnd (sic) an der vorgenanten hofstat vnd fu^er allen den chrieg, den si mit einander habent gehabt, vnd der vorgenant Chv^enrat des Stelczer svn vnd sin Swester taten willechlich fu^erziht des vorgenanten wingarten vnd der vorgenanten Hofstat mit Gerunges hant bern Choln svn vnd mit frideriches hant an dem Gasteig, die ze den ziten der wingarten Stifter vnd sto^eraer waren, vnd Chvnrat der alte Stelczer vnd sin svn Chv^enrat habent den egenanten Engelschalchen vnd siner chonn frowen Elspethen vnd Chv°nraten dem Hosmv°nde vnd siner chonn frowen alheiten ir leibe vnd ir gu°t ze rehtem scherme gesaezt fu^er die vorgenanten jvnchfrowen des Prevmeisters eninchel, dev zv^e ir jaren niht chomen was. vnd wan dev vorgedaht wandelvnge mit vnserm rat vnd mit vnser gewizzen geschehen ist, des geben wir den oftgenanten Engelschalchen von Stadel vnd siner hv°sfrowen Elspethen vnd Chv°nraten dem Hosmvnde vnd siner Hv°sfrowen alheiten vnd allen ir erben zv° einem Sihtigen vrchv°nde vnd zv° einer ewigen vestenvnge disen prief mit vnser Stat jnsigel versigelten. Dicz ist geschehen vnd dieser prief gegeben, do von Christes Geburt ergangen waren Tvsent jar, Drevhvndert jar vnd in dem fv^enften jar darnah an Sanct Gerdrvten tage in der vasteN.

Source Fulltext: OÖUB 4 (Wien 1867) S. 480-481, Nr. 516