Ich Jans Hosmund, Albrecht Amichsel vnd Perchtolt Hosmund all Burger ze Pazzowe Wier veriehen offenlich mit dem Brif, Daz wier vmb den Chrieg, der czwischen vns an ainem tail vnd Jansen dem Richter zsant Polten an dem andern tail gewesen ist vmb Vier Weyngarten, der czwen ze Newnburch gelegen sind, der haizzet ayner der Aychweg, der ander di hofstat an dem Gasteyg Vnd czwen dacz Stayn, der ayner haizzet der Geyrsperch, vnd der ander der Spyczinger an dem Viertayl Vnd funf czehenthouser in der Aptay an dem Wald vnd czway gu^et in der Aptay cze Wylhemperg, die gewesen sind der Ersamen vrowen vrow Margreten des Czeller Tochter von Pazzowe dez vorgenanten Jansen Housvrowen, der got genad, vnd auch vmb all ander hab, an wev di gelegen ist oder wi di genant ist, fu^er vns vnd fu^er vnser Erben gegangen sein hinder vnsern genedigen Herren den Hochgeborn Fu^ersten Byschof Albrechten ze Pazzowc, waz der darvber spraech, daz wier daz staet halden solten. Der selb vnser vorgenanter Herr Byschof Albrecht hat nach rat vnsreu recht gewegen vnd dez vorgenanten Jansen recht vmb di vorgeschriben hab vnd chrieg vnd hat gesprochen darvber in spruchs vnd schyedung weis vnd auch vns daz paydenthalb gepo^et staet ze halden vnd wer ez widersprêch oder nicht staet hielt, daz im der veruallen waer Hundert pfunt vnd den, di sein mitsampt im schiedleut gewesen sind, funfczig pfunt allz Pazzower pfenning. Daz von erst Jans der Richter von Sand Po^elten die vorgenanten Weyngarten vnd all ander hab vnd gu^et, an weu daz ist, daz di vorgenant Margret lazzen hat, ledichlieh haben schol an allen Chrieg vnd an all ierrung vnd allen seinen frumen domit schaffen mit verseczen vnd mit verchouffen oder geben, wem er welle an allen iersal als ander sein Aygenhaft gu^et. Vnd daz der obgenant spruch vnd di sach also staet beleib vnd vnczebrochen, Darvber geben wier fu^er vns vnd vnser Erben disen Brif versigelten mit vnsern anhangunden Insigeln, Der geben ist ze Pazzowe am Vreytag vor Sand Gorgen tag nach Christes gepu^erd Dreuczehen Hundert jar, Darnach in dem czwai vnd Vierczkisten jar.

Source Fulltext: OÖUB 6 (Wien 1972) S. 407f., Nr. 404