Ich Heinreich der schiche Purger ze Wels vnd ich Chinegunt (sic) sein havsfrowe vnd vnser Paider Erben vergehen vnd Tuen Chunt an dem prief allen den, di in sehent, horent oder lesent, daz zu vns Chomen ist levpher vnd vlreich sein Ohaim vnd habent vns ermont mit gueter gebissen ains Erbrechcz Auf vnserm hof, der genant ist der Odhof, gelegen am Chirichperch in der pfare ze Chirichtorf vnd vnser recht lehen ist von vnserm Gnaedigen herren hern Eberharten von walse der weil Gebaltiger Haevtpman (sic) ob der Ens, nu hat vns levpher vnd vlreich dez ermont, daz wier in durch ier lieb vnd pet willen dez selben rechten geholn haben. Darnach so ist zu vns Chomen levpher vnd sein Erben vnd habent mit ier guetem willen vnd wort ier Erbrecht aevf dem selben hof ze Chaevfen geben ier oehaim Vlreichen vnd seiner haevsfrowen Ofmein vnd iren Erben vnd schol vns von den zwain Erbrechten des vorgenanten hofs vlreich oder sein haevsfrowe oder ier Erben Dauon alle iar Dienen an vnser frowen tag der dienstzeit an dreisk Drithal (!) pfunt alter wiener Pfening vnd zwo gens vnd vier huenr vnd ze weinachten vier Chaes fu^er zwen vnd dreisk vnd Prot fu^er sechzehen, ze Faschang zwai huenr, ze Ostern vier Chaes fu^er sechzehen vnd ain halpfunt ayr vnd wenne daz ist, daz sev uns den vorgenanten dienst nach dem vorgenanten Tag achtag versezzen, so schullen sev vns Darnach sechzik phening ze wandel verfallen sein vnd wenne daz ist, Daz sey ier recht an dem vorgenanten hof verChaevfen wolten, so schol vnd der abfert, vns geben ain halpfunt vnd der aevffert, ain halpfunt. ist awer, Daz iz sich mit dem Tod verwandelt, so schullen sev vns dez selben reehtz gepunden sein. Daz in die vorgeschoben gelub von mier hainreichen dem schichen vnd von mein Erben staet vnd vnuerchert weleib. Daruber so Gib ich in ze vrchunde Den prief mit meim anhangundem insigel. Der prief ist geben, Do man zalt von Christ gepuerde Drevtzehen hundert iar vnd in dem Drev vnd viertzkistem iar dez sampstags nach dem weinnacht tag.

Source Fulltext: OÖUB 6 (Wien 1972) S. 460f., Nr. 456