Ich Vlrich Von Chappell Vergich vnd tun chunt allen den, die disen brief sehent oder horent lesen, Daz ich daz gvt in der Pivnt, daz ich von Heinrichen dem Tivrwanger han von im gechauft zehen schilling geltz, Daz selb gvt han ich geben, daz man dem heiligen herren sand jacob alliv jar schol dienen zehen schilling alter wienner phenning gen Slierbach in die kirchen zv ainem ewigem lieht, daz naht vnd tag brinnen schol, vnd schol dienen ain hvn zv Vogtreht ze Slierbach in daz havs also beschaidenlichen, daz ich ain wis han genomen mit des pfarrer gv^etlichem willen Vnd mit aller pfarrerlevt willen dem hailigen herren sand jacob fvr daz Vorgenant gv^et in der Pivnt Vnd han ouch die selben wis geben dem heiligen herrn sand Vlrichen Vnd von der selben wis schol man dem hailigen henn sand Vlrichen belv^ehten dez nahtes ewichlichen Vnd wer dez hailigen herrn sand jacob zehmaister ist, der schol dez vorgenant gv^et inn haben in der Pivnt Vnd schol dem hailigen herrn sand Jacob naht vnd tag belv^ehten, Vnd wer zehmaister datz sand Vlrichen ist, der schol die vorgenanten wis inn haben Vnd schol dem hailigen herrn sand Vlrichen belv^ehten ewichlichen. Daz disev rêd staet Vnd vnzebrochen beleib, darvber gib ich egenanter her vlrich von Chappell disen brief versigelt mit minem anhangvndem jnsigel Vnd mit des pfarrer jnsigel hern hainrichen von Wartperg, der ze den ziten pfarrer was. Der brief ist geben an sand Niclavs abent, do man zalt von christes gepurd drevzehen hvndert jar, darnach in dem sehs vnd Vierzigistem jar.

Source Fulltext: OÖUB 6 (Wien 1972) S. 568, Nr. 562