Ich vlrich von Chappell vnd all mein erben wir veriehen offenbar an disem prieff vnd Tu^en chund allen den, die disen prieff sehent oder hornt lesen, daz ich daz gu^et in der pewnt, daz ich gechauft han von heinrich dem Tewrwanger, han cze chauffen geben ortolfen vnd seiner hawsfrawn zachein vnd allen iren erben ze einem rechten chauffrecht also peschaidenlich, daz man von dem vorgenanten gu^et schol dienn alle iar an vnsrer frawntag ze der dienczeit czehen schilling schilling (sic) phenning alter wienner dem heiligen herrn sand Jacoben gen slirbach zu einem ewigen liecht, daz tag vnd nacht prinnen schol, vnd man schol geben cze anlayt vier phennigen vnd ze ablayt vier phenning sand jacob vnd czwai vogthverr (sic) gen slirbach zu dem haws. wer aber daz getan, daz der vorgenant ortolf vnd sein hawsfraw zachei vnd all ir erben wolten verchauffen oder verseczen, so schol man sew nicht iren also peschaidenleich, daz dem heiligen hern sand jacob decz vorgenanten dinst vnd di czwai vogthverr icht abge vnd schol man auch chain vadrung nicht mer vadern, den vorgeschriben stet an disem prieff, von dem vor verschriben gu^et in der pewnt, Daz disew red sta^et vnd vnczebrochen peleib, darvmb gib ich vorgenanter vlrich von Chappelln disen prieff versigelten mit meinem anhangunden insigel cze einem warn vrchund diser sach. Der priff ist geben nach christi gepurd über dreuczehenhvndert iar, darnach in dem sechs vnd vierczkistem iar dez mitechen nach sand gallen tag.

Source Fulltext: OÖUB 6 (Wien 1972) S. 563f., Nr. 557