ICH Chunigund di Chrayaerinn vnd alle mein erben wier veriechen vnd tu^en chunt offenleich mit disem prief allen den, die in sechent, ho^erent oder lesent, die nu sind vnd hernach chunftig werdent, daz wier gelten schullen dem erbern mann Chu^enraten dem Hudermasch purger ze Gmunden vnd seiner hausvrawn vnd allen ieren erben hundert phunt phenning alter wienner mûnzz, vnd fu^er die selben phenning da hab wier in fu^er gesaczt vnsern hof auf der Swant gelegen in Lochiricher pharr, der von alter v^enser recht aygen ist, vnd haben auch daz tan mit wolbedachtem mu^et ze der zeit, da wier ez wol tu^en machten, vnd ist auch die selb wandlung geschechen mit meines hern vnd vater willen vnd wart hern Dyetreichs dez Geltinger vnd aller v^enser payder erben, die darzue geho^erent, mitt allen den nuczen vnd rechten, die darzue geho^erent ze holcz vnd ze veld, besu^echt vnd vnbesu^echt, wie daz genant sey vnd als ez von alter hercho^emen ist. Cho^em aber yemant, der pesser erib wolt sein dann wier vnd ander v^enser erben, der schol den vorgenanten hof lo^esen von dem vorgenanten Chu^enraten dem Hudermasch vnd von seinen erben fu^er die vorgenanten hundert phunt pfenning. Vnd daz in die red also staet vnd vnuerchert beleib, darv^eber so geben wier in disen offen prief versygelten mit meines hern vnd vater hern Dyetreichs des Geltinger anhangundem insygel vnd mit dez erbern mann Hainreichs dez Wu^ermtaler ze den zeiten pu^ergraf ze O^ert anhangundem insygel vnd mit dez erbern mann Otten dez O^etenanger anhangundem insygel in an schaden, die wier vleizsichleich darvmb peten haben vnd die diser sach zeug sind. Der geben ist nach christes gebu^erd drevczehen hundert iar, darnach in dem naewn vnd vierczigistem iar dez nachsten svntages nach sand Jacobs tag.

Source Fulltext: OÖUB 7 (Wien 1876) S. 118f., Nr. 119