ICH Hainreich der Schikch vnd ich Helmweig der Schikch purger ze Wels vnd vnser paider hausfrawen vnd all vnser paider eriben veriehen offenleich an dem brief vnd tun chunt allen den die in ansehent oder ho^erent lesen, daz wir ze chauffen haben geben dem erbirdigen herren hern Eberhart von Waltse zten zeiten haubtman ob der Ens die gu^et die hernach geschriben stend mit allen nuczen versu^echt vnd vnuersu^echt, ze holcz vnd ze veld auz vnser nucz vnd auz vnsrer gewer in sein nucz vnd in sein gewer mit allen den rechten vnd wir sie gehabt haben, vmb drew hundert phunt vnd zwai vnd zwainczikch phunt phening alter wyenner mu^enzz also beschaidenleich, daz wir noch all vnser paider eriben noch niemant von vnsern wegen furbas chain ansprach noch vodervng nimermer gehaben noch gewinnen schu^ellen nach den hernach geschriben guten, vnd sein auch der hernach geschriben gu^et ir gewer an aller stat als lancz recht ist ob der Ens, jtem ze dem ersten den O^edhoff gelegen vnder dem Chirichperig vnd den hoff ze Chanczling vnd den zehent den man dorzue gevessent hat dez zweliff zehent hauser sind, vnd die mu^el die auch bei Chanczling leit, vnd daz gu^et ze Pirihen vnd zwai gu^etel ze Ra^ewhenperig vnd ein gu^etel auf dem Hasenpu^ehel vnd die Schikchengrueb. Daz im daz stêt vnd vnuerchert beleib, geben wir in den brief versigelten vnder meinern anhangunten jnsigel zue einem waren vrchu^end. So verpintt ich mich egenanter Helmweig der Schikch bei meinen trewen vnder meins pruder Hainreichen dez Schikchen anhangunten jnsigel alles stêt ze behalten vnd ze volfu^eren daz daz wor an dem brief geschriben stêt, vnd zue einer pessern sicherhait vnd zevgnu^ezz vnder dez erbirdigen herren hern grafen Ybon von Perenstain anhangunden jnsigel, der daz an den brief gehangen hat durch vnsrer pett willen im an schaden, vnd ist auch derselben sach chauffer vnd hingeber gewesen. Vnd daz ist geschehen do von Christi gebu^erd ergangen waren drewzehen hundert jar vnd darnach in dem acht vnd ffumfczigistem jar dez nechsten phincztags vor sand Mathias tag dez heyligen zweliff poten.

Source Fulltext: OÖUB 7 (Wien 1876) S. 556f., Nr. 544