ICH Jans von Grueb zu den zeiten richter ze Chirichdorf vnd mit mir mein hausvrawe Agnes vnd mit vns aller (sic) vnser erben veriehen an dem brief vnd tu^en chund allen den di in sehent oder horent lesen, daz ich mit wolbedachtem muet vnd gu^etleichen willen aller meiner erben vnd nach meiner nachsten vnd pesten vreunt rat vnd gunst daz (sic) ich gestifft vnd gemacht han ein ewige messe ze Chirichdorf in der pfarrchirichen auf vnser vrawen alter durch hail vnd trost meiner sel vnd aller meiner vodern sel willen, vnd ist daz geschechen mit dez erbern herren gunst vnd willen maister Gerunges zden zeiten pfarrer ze Wartperig also mit ausgenvmmen warten, wer pfarrer ist ze Chirichdorf, daz der ewichleich auf dem vorgenanten alter alle wochen sol haben di ersten messe an dem eritag vngolten der rechten pfarrmesse di da von alter herchomen ist. Wer aber daz daz in ehaft not irret vnd daz die messe nicht volpracht vnd volfurt mo^echte werden an dem obgenanten tag, so sol er sei erstatten an den nachsten tzwain tag ainem. Vnd daz daz geschech darvmb haben wir geben vnser mul zu dem vorgenanten alter di gehaizzen ist an der Grueber mul, di vnser rechts aygen ist von dem gotzhaus ze Pabenberch, da man von dient alle jar ain pfunt pfening alter wienner pfening an vnser vrawn tag zder dienstzeit vnd ze weinachten acht pfening fur prot vnd ze ostern fur vier tagwerch acht pfening. Wir haben auch di obgenanten ewigen messe gestifft vnd gemacht ze Chirichdorf in dem marcht durch aller purger hail willen di nu sint oder hernach chunftig werndent. Is ist auch ein warew gewizzen, daz nicht mer gestiffter messe ist in der pfarrchirichen an dem selben tag mit den drin herren di darzu^o gehorent, danne di erst messe vnd di mess di von alter herchomen ist, wand man der tzwayr mess wol zuchomen mag mit den drin herren di doch da muezzen sein. Is ist auch mer ausgenumen, wann ich obgenanter Jans abgieng vnd nichten wer, so sol der brief beleib pei den erbern purgern ze Chirichdorf vnd mit dem tot erben von ainem auf den andern vnd geben werden nach der purger rat ainem der in nach sein trewen innehab. Wer aber daz daz di messe nicht volpracht wurd als vorgeschriben stet, so sullen di purger daselb den brief furpringen vnd in tzaigen dem erwirdign herren dem byscholf ze Pazzawe vnd daz er schaffe mit den herren daz si di messe volpringen vnd erstatten. Geschech aber dez alles nicht, so sullen sich di erbern purger der obgenanten mul vnderwinden vnd vnderziechen vnd vnser vraun alter den obgenanten gelt anlegen, da er als wol gelegen sei also, wer stirbt auf der obgenanten mul, so schol die witib auf der selben mul geben ze totrecht sechtzich pfening ze anlait vnd zabvert auch sechtzieh pfening vnd nicht mer. Vnd dez zu einem waren vrchund vnd bestettigung gib ich vorgenanter Jans zder zeit richter ze Chirichdorf vnd mein erben in den offen brief versigelten mit meins genedign herren pyscholf Gotfritz ze Pazzawe anhangunden jnsigel der di ewigen mess damit bestetigt, vnd zu einer pessern bestetigung mit meins vorgenanten Jansen anhangunden insigel. Geben nach Christi geburd dreutzehen hundert jar vnd in dem acht vnd fumftzigsten jar an sant Elspetten tag.

Source Fulltext: OÖUB 7 (Wien 1876) S. 603f., Nr. 592