Hanns der Jud vergich vnd tun chund mit dem offenn brief, das ich mit verdachtem mut vnd nach weysung vnd rat erberr pider läwt mich frewntlich vnd schön vericht vnd veraint han mit der erwirdigen frawn Katherina diezeit abtissin ze Slierbach von aller der hab vnd geschäfts wegen, das mir die erber fraw Elspett die Hofmundinn sälige, der Got gnad, geschaft vnd gemaint hat, in solicher beschaidenn, das sew vnd ir nachkomen mir järleich alle jar zu meinen tägen raihen vnd geben sullen leibgedings drew phunt wienner phennig halb zu vnser Frawntag zder dienstzeit vnd halb zu den Weihnachten an vercziehen pey irem gotshaws ze Slierbach in solicher beschaiden, wann das ist, das ich oder mein gewisser scheinbot das vorgenant gelt an sew aischen, das wir in dann ainen quitbrief geben sullen besigelten mit ains statrichter ze Steyr aufgedruhtem insigel, wer der je in chünftigen zeiten ist. Wär aber, das sew mir das obgenant gelt zu yeder obgenanten vrist iärleich nicht awsrichteten vnd gäben, als vor berürt ist, was ich dann meins obgenanten gelts schäden näm, wie der schad genant würd, den ich pey meinen trewn gesprechen mag, des sullen sew mir ablegen vnd widercheren an all widerred vnd sol ich das haben vnuerschaidenleich auf aller irer vnd irs gotshaws hab vnd die dauon bechomen paydew dienst vnd schaden, so ich nächst mag an alle irrung vnd widerred mit irm vnd ir nachkomen willen vnd wort. Wann auch das wär, das ich pey dem land nicht wär wie sich das füget, das ich das egenant gelt zu den vorgenanten tagen nicht vordret oder vordern möht, wann ich es dann hin nach zu den egenanten tagen aisch, so sullen (sie,) wes si mich nicht ausgericht haben, ausrichten vnd miteinander bezaln in aller der mass vnd rechten, als oben geschriben ist. Ich sol auch egenanter Hanns noch niempt von meinen wegen von dem hewtigen tag, als der brief geben ist, von der vergangen nucz wegen, die sew mir solten geraicht haben, nichts mer gen in noch irm gotshaws darumb ze sprechen haben weder mit reht noch an reht an geuär. Vnd des ze vrchund gib ich obgenanter Hanns der Jud der egenanten frawn Katherina vnd dem conuent des gotshaws ze Slierbach vnd irn nachkomen den brief besigelten mit der erbern Wolfhart des Inbrukger dizeit phleger ze Steyr mit der payder||
der anhangunden insigeln, die ich darumb vleisschleichen gepeten han, in vnd irn erben an schaden, darunder ich mich obgenanter Hanns verpint mit meinen trewn an ayds statt, das oben an dem brief geschriben stet, stät ze halten an geuär. Geben nach Kristi gepurd drewczehen hundert jar darnach in dem newn vnd achczigisten jare des nachsten Phincz tags vor sand Gregoritag.

Source Fulltext: OÖUB 10 (Wien 1933) S. 543-545