"In nomine sancte et indiuidue trinitatis. Amen. Gebhardus(1) Dei gratia Patauiensis episcopus omnibus presentem paginam inspecturis salutem in Domino. Ad noticiam perueniat omnium presentem paginam intuentium, quod nos uolentes absoluere feodum illud, quod Witigo(2) nobilis homo de Boemia, a nobis et Patauiensi possidet ecclesia, in hoc cum ipso conuenimus, quod ei CCCtas marcas argenti Patauiensis ponderis pro quadam parte feodi solueremus, que protenditur a fluuio illo, qui dicitur Rveschemuhel(3), in inferiori parte usque ad Danubium, quicquid ipse in dictis terminis a Patauiensi ecclesia dinoscitur possidere homines, agros, cultos et incultos, infeodata et non infeodata, tali condicione interposita, quod ei in festo purificationis beate uirginis(4) proximo uenturo, C marcas persoluamus, in pentecoste C, in festo beati Martini(5) similiter C, hoc tamen pacto interposito, quod si in secunda solutione in festo uidelicet pentecostes, C marcas persoluere negligamus, prima solutio C marcarum sit deperdita; et si tercia solutio, uidelicet in festo beati Martini, neglecta fuerit, ex tunc soluciones sint deperdite precedentes. Predictus etiam nobilis Witigo prefatum feodum, quod, sicut diximus, a Ruschmvhel in inferiori parte usque ad Danubium protenditur, nobis tali pacto obligauit, quod, quando nos ei predictam pecuniam persoluamus, siue in terminis constitutis siue ante, ex tunc predictum feodum nobis et ecclesie uacabit libere et penitus absolute. Quod si prefatam pecuniam terminis constitutis neglexerimus, quidam ministeriales nostri, quos inferius subscribemus, fide data promiserunt, quod ei possessionem predicti feodi, quod nobis obligauit, restituant et resignent. Si uero predictam conuentionem ratam habere nollemus, Otto de Tegernbach(6) et Waltherus de Tannberch(7), ministeriales nostri, in dominica Inuocauit(8) ad villam predicti nobilis, que Predal(9) dicitur, accedent et inde non recedent, quousque quinquaginta marce predicto uiro nobili persoluantur. Prefatus quoque nobilis fide data uice sacramenti firmiter compromisit, omnia feoda sua, que a Patauiensi possedit et possidet ecclesia, in manus nostras obligando, quod ipse in iudicio illo, quod in bonis a nobis comparatis a duce Austrie(10) habere dinoscitur, iuxta peticionem nostram et instructionem facere debeat, ut nostre ecclesie conseruetur et si aliquis nos in dicto iudicio gravare presumpserit, ipse per ius et potentiam nobis et ecclesie illud tenebitur defensare. Quod si facere non poterit uel noluerit, de predictis CCCtis marcis L nobis tenebitur relaxare. Et ne aliquis tali facto per aliquam calumpniam ualeat contraire, presentem paginam, tam sigillo nostro quam sigillo predicti nobilis decreuimus communire. Huius rei testes sunt Waltherus de Tannberch, Heinricus de Winspach(11), Chunradus Zachhalm(12), Heinricus de Monte(13), Wernhardus et Irnfridus, fratres de Pogesruke(14), Siboto et Heinricus fratres de sancto Vlrico(15), Fridericus de Hengestslage(16), Wernhardus Jovchenberge(17), Heinricus de Griezperge(18), et alii quam plures. Datum apud Velden(19) anno Dominice incarnationis Mo CCo XXXIo, XVIo kalendis ianuarii indictione IIII."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 6, S. 25-27