"Nos, H. miseracione diuina abbas(1), L. prior(2), S. subprior(3), totusque conuentus ecclesie Mylewzensis(4), omnibus presentibus et futuris, ad quos presentes peruenerint, salutem in eo, qui est omnium vera salus. Cum filialis nostra ecclesia beate virginis in Plaga(5) per quosdam sibi vicinos, venerabiles sacerdotes et nobiles ac alias personas singularis fauoris ac promocionis receperit incrementum, et in posterum ab eisdem ac ipsorum sequacibus ex confraternitate, quam in ipsarum salutem animarum in prefata ecclesia perpetuo celebrandam, laudabiliter ac salubriter statuerunt, possit et valeat uberius irrigari, nos omnibus, qui eandem in presenti contraxerunt, aut Domino inspirante contraxerint in futurum, plenam confraternitatem nostre ecclesie porrigimus, efficientes ipsos participes omnium bonorum spiritualium, que in missis, vigiliis ac oracionibus de cetero in nostra ecclesia a nostris fratribus exsequentur, habentes nichilominus ratas et firmas quaslibet constituciones ac pollicita, que iidem nostri fratres in singulari fraternitatis priuilegio conscripserunt. Et ne in posterum eadem veneranda fraternitas labente tempore elabescat, aut in sepefata filiali nostra ecclesia per fratres nostri ordinis aliqua negligencia oriatur, volumus et promittimus annis singulis in paterna nostra visitacione, de eadem inquisicionem facere specialem, lima correctionis debite, si quas, quod absit, in prefatis nostris filiis aut preposito obmissiones sev negligencias perpetratas invenerimus corrigendo. In cuius rei testimonium presentes litteras dedimus sigillorum nostrorum munimine roboratas. Datum anno Domini millesimo CCCo. septimo, jnfra octauam omnium sanctorum."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 73 (S 58), S. 89-90