"Ich, graf Hainreich der elter von Schavnberkh(1) vergich vnd tuen chunt allen den, di disen brief sehent oder hoernt lesen, daz ich mit verdachtem muet vnd mit willen vnd gunst aller miner erben dem gotshaus ze dem Slegel(2) mir vnd allen minen vodern vnd minen nach chunften ze einem selgeret, vreiung dotz Aschah(3) han ge geben alle dem, daz man dem selben gotshaus do hin auf fuert von wein vnd von getraid, daz in daz selb chloster gehoert an gever, also mit beschaidner red, daz man ewichleich nicht mer dann zwelif pfenning ze Aschah geb, swann ir guet do hin engegen gefuert werd, ze einer gehugnusse, als anderev chloster, di daz recht do habent, vnd daz auch di herren von dem vor genanten chloster ze dem Slegel ewichleich alle jar des nesten mentages nach mitter vasten mein vnd meiner hausvrowen, vron Agnesen(4) vnd aller meiner vodern vnd miner erben gehugnusse(5) haben mit vigili vnd mit selmessen in aller der weis, sam ob wir leichenheftichleich do engegenwuert stuenden, vnd wer auch, daz di herren von dem obgenanten gotshaus daz von chainerlai sachen daz versaumten vnd vber giengen, so schol in ir recht dotz Aschah, daz hie vor verschriben ist, auch ab gen. Vnd daz in vnd vns daz also stet vnd vnuerchert beleibe, dar vber gib ich disen brief ze einer stet, versigelten mit minem jnsigel. Der brief ist gegeben datz Schawenberch, nach Christes geburt tausent iar, drev hundert iar, do nach in dem achzehenten iar, an sand Agnesen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 102 (S 84), S. 117