"Wir Heinrich(1), Ott(2) vnd Hainrich(3), von Gots genaden pfallentzgrafen ze Reyn(4) vnd hertzogen in Baiern, veriehen offenbar an dem brief, wan wir nv gewesen sein ze den Slegen(5), daz vnser frawen stift ist, gelegen an dem wald, vnd haben da an gesehen dev grozzen armmvot vnd notichait, die der probst(6) vnd die bruoder des selben gotshauses leident vnd auch tragent. Nv haben wir dvrch Got vnd dvrch vnser frawen willen ze voderist, vnd dvrch vnser vnd vnserr voruodern hail vnd sæld mit guoter gwizzen nach vnsers rates rat gegeben ze stewer dem selben gotshaus ain pfunt weytes vnd vier pfvnt chlaines saltzes(7), daz der probst vnd die bruoder daselben, die ietzuo da sint oder fuerbaz dar choment, ewichlichen ze ainem mal in dem jar verfveren suellen frêy vor aller mavtt vnd zoll ze Pvrchausen(8) vnd auch ze Schærding(9). Vnd sol auch si an der oben genanten frêyung, dev wir in ewichlichen gegeben haben, dhein vnser amptman dar an nicht irren. Vnd dar veber ze einem vrchvnd vnd ze einer bestætichait geben wir in den brieff, versigelten mit vnsern jnsigeln. Der ist gegeben ze Pvrchausen, do man zalt von Christes gebvrtt drevtzehen hvndert iar, vnd dar nach in dem siben vnd zwaintzigisten iar, an sand Vrbans tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 121 (S 101), S. 130-131