"Wir, Albert(1), von Gotes gnaden bischof ze Pazzow, veriehen offenbar mit disem brif, daz wir dem ersamen probst Vlreichen(2) von dem Slegel vnd seinem gotzhaus gelten svllen viertzig marchk silbers, ie zwen vnd sibentzig grozzer Behemischer fuer ein igleich marchk(3), der wir im beliben sein, an der losung des guetes ze Epping(4), daz Vlreichen dem Chrotendorfer(5) von vns stvend. Di selben vierzig marchk schaffen wir im, datz Chunrade(6) vnserm mautter ze Pazzow, oder swer di mautt zden zeiten von vns hat, der sol in der richten von pfingsten di schirst choment vber ein iar. Wer aber, daz der selb Chunrade, oder swer di egnanten mavtt von vns hat, den selben probst oder seim gotzhaus der obgenanten viertzig marchk auf den selben tag nicht richtt, swas des der probst schaden nimt vnd sein gotzhaus, den sol im Chuonrade, oder swer di oft gnanten mavtt von vns hat, gentzlich vnd gar ablegen, vnd svllen wir des fleizzich vnd gholfen sein. Vnd dar vber ze vrchund geben wir disen brif, versigelten mit vnserm jnsigel. Der ist gebn ze Pazzow, nach Christes gebuort dreutzehn hundert iar, dar nach in dem nevn vnd zwaintzigisten jar, des nesten vreitags nach Ostern."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 124 (S 104), S. 133-134