"Wir, Albrecht(2), von Gotes gnaden bischof tze Pazzowe, veriehen offenlich mit disem [brief](a) vnd tuen chunt allen den, di in sehent oder horent lesen, di nu lebent vnd her nach chumftig werdent, daz wir wol bedaht mit gunst vnd willen [vnsers] erwirdigen capitels tze Pazzowe vnd vnserm gotshaus cze pezzerung, recht vnd redlich verchaufft haben vnsern markcht tze Haslach(3) vnd allz daz dar [zue gehort], cze veldt, cze dorff, cze holtz, cze wazzer, vischwaid, wismad, gestifft vnd vngestifft, gepowen vnd vngepowen, versuht vnd vnuersuht, als iz von alter [gewonhait] herchomen ist, dem edeln erwirdigen vnserm liben swager Petern von Rosenberch(1), obristen chamrer in Behem, vnnd seinen erben, vmb dreyczehent [hundert] phunt Pazzower pfenning, also mit der bescheidenheit, daz der vorbenant vnser swager von Rosenberch vnd sein erben den selben markcht [vnd waz dar] czu gehort, als obgeschriben stet, vnd als er vns daz emaln verchaufft het, von vns vnd vnserm gotshaus tze rechtem lehen haben sullen. Vnd haben [auch] wir im daz recht vnd redlich verlihen nach deutschem lehen reht. Also, daz er daz vmb vns vnd vnser gotshaus verdienen sol als ein man seinev lehen, vnd auch also, daz di vest(4), di wir in dem markcht gepawen heten, wir nider legen sullen vnd alle græben tze Haslach in tzihen vnd sleht machen. Vnd sol weder vnser swager der vorbenant noch sein erben, noch swem si iz verchauffent, di nicht mer auf heben noch pawen, noch dhain ander vest vahen noch pawen in den gmerkchen, di tzu Haslach gehorent, di er vns nach seinem ayde auz getzaiget hat, an vnsern vnd vnsers nachchomen oder vnsers capitels, ob nicht bischof wær, guten willen vnd gunst. Vieng er dar vber oder sein erben dchain vesten oder ander yemant, da di lehen an geuiellen oder choemen, so sullen si vns ledich worden sein. Vnd an vns vnd vnser gotshaus ledichlich geuallen. Ez sind auch daz di gemerkcht: ob der Hayd(5) vntz in di Lædnicz(6), vnd von der Lædnitz ob Herleins Oed(7) vber durch daz veld, daz tze næchst an dem wald leit, vnd fuerbaz tzwischen der Rosenowe(8) vnd Sterling(9) vnd da selb ob Rosenow in den perch(10) vnd von dann oberthalb sand Oswald(11) ob Sattlærn(12) in den perch vnd dann oben veber vntz gen Wurmprant(13) an des probst gemerkcht von dem [Slegel(14), ez sullen] auch vischwaid vnd vischpan auf den wazzern, zol, mautt, lantgericht vnd gericht, manschaft vnd lehenschaft ze Haslach gehoren, nicht anders, dan [als si von] alter gwonheit vnd recht dar czue gehort habent. Wær auch, daz der vorgenant vnser swager von Rosenberch oder sein erben den vorgeschriben markcht vnd waz dar tzue gehort, verchauffen, versetczen oder verchummern wolten, so sullen si vns, vnser nachchomen oder vnser capitel, ob nicht bischofs wær, daz vor allen levten an pieten, vnd wellen wir vnser nachchomen oder vnser capitel daz haben, des sullen si vns guennen vnd verchauffen fur all ander leut. Wollen aber wir daz nicht haben, so sullen si iz dhainem ierem obrern tze chauffen geben noch verchummern, dann ierm gnozzen. Daz di red also stæt beleib vnd vnczebrochen, dar veber geben wir disen brif, versigelten mit vnserm anhangenden jnsigel, der ist geben tze Haslach, des nachsten eritags nach vnser vrowen tag in dem herbst, nach Christes gepurd drevtzehen hundert jar, dar nach in dem ains vnd virczkisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 139.b, S. 145-147