"Ich, Marchart der Choeginger(1), mein havsfrau vnd all vnser erben veriehen offenbar an dem brief, daz wir ze chauffen haben geben Martein, meinem svn, vnsern zehent ze Geistdorf(2) vnd ze Sikkenpach(3), di zwe gans besuecht vnd vnbesuecht mit allen nuotzen, vmb vier pfunt Regens[burger](4) pfenning, mit dem beschaiden, daz wier gwalt haben, den obenanten zehent wider ze chauffen von Lichtmizz, di schirst chumt, veber zway jar vor viertzehen tag, vmb vier pfunt Regensburger pfenning, di dann gib vnd gaeb sint; taeten wir dez niht, so ist der obenante zehent Martein vnserem erben gechauffter zehent, vnd haben fuerbaz auf den zehent nihts mer ze sprechen, weder mit worten noch mith rechten, mit recht noch an recht. Wir haben im den zehent auf geben in herren hant, wir schazzen in mit vnsern trevn, daz wir in trevleich vnd freuntleich svllen mit gewaern vnd anders niht. Vnd swer den brief ynn hat, von seinen wegen, mit seinem willen, der hat allev reht, di Martein vnd sein erben habent gehabt, vnd swaz wir dar vmb mit in wolten chriegen oder rechten mit gaistleichem oder weltleichem reht, daz sullen wir alles verloren haben vnd si behalt vnd gw[onn]en. Wan wir nicht aygens jnsigel haben, geben wir in den brief mit Haydlains dez Stuerfpechen(5) vnd Juhans von Muettgan(6) jnsigel versigelten, in vnd iren erben an allen schaden. Datum anno Domini millesimo CCCmo quinquagesimo quinto, an sand Elspeten tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 154 (S 121), S. 159-160