"Wir, Gotfrid(1), von Gots gnaden bischof ze Pazzow, bechennen offenleich mit disem brif, daz di geistleichen leut, bruder Jans(2) probst, Vorichtlieb(3) preiol, vnd di sammung gemain von sand Marein Slag vns vnd vnserm gotshaus ze Pazzow geben habent di aigenschaft, di si vnd ir gotshaus z‘sand Marein Slag gehabt habent an den guten dacz Melben4, des zway pfunt phenning gelts ist, vnd dacz Herhag(5), des ain pfunt pfenning gelts ist, vnd den ganczen zehent dacz Veuchtenpach(6), der do leit auf zwain pfunt pfenning gelts. So haben wir in vnd irem gotshaus hin wider geben ze einem widerwechssel di aygenschaft, di wir vnd vnser gotshaus ze Pazzow gehabt haben an den guten dacz Wurmprant(7), des drew pfunt pfenning gelts ist, vnd zway tail des ganczen zehents auf den selben guten, di der edel ersam Pilgreim von Tannberch(8) von vns vnd vnserm vorgenanten gotshaus ze lehen gehabt hat. Vnd der selben aigenschaft an den vorgenanten guten dacz Wurmprant vnd der zwair tail zehents dar auff verczeihen wir vns mit vrchund diczs brifs, der geben ist mit vnserm anhangunden jnsigel, nach Christs geburd dreuczehen hundert jar, dar nah in dem sechs vnd fuemfczgistem jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 159 (S 125), S. 163-164