"Ich, prveder Janns(1) probst, Vorchtlieb(2) der preiol, vnd di samnvng gmain von send Marein Slag veriehen offenbar an disem prief, daz wir vnzerm herren, dem wirdigen pischolf von Pazzaw(3) vnd dem hailigen send Stephan da selbst geben haben di ||
aigenschaft, di wir vnd vnzer gotshauz von send Marein Slag gehabt haben an den gveten dacz Melben(4), dez czwai phvnt phenning geltz ist, vnd dacz Herhab(5), dez ain phvnt phenning geltz ist, vnd den ganczen czehent dacz Vevchtenpach(6), der do leit auf czwai phvnt phenning geltz. So hat er vnz vnd vnzem chloster herwider auf geben czv ainem wider wechsel di aigenschaft, di er vnd sein gotzhauz gehabt hat an den gveten dacz Wurmprant(7), dez drew phvnt phenning geltz ist, vnd czwai tail dez ganczen czehent auf den selben gveten, vnd di der edel herre, der Pilgreim von Tannberch(8) von dem vorgenanten gotshavz von send Stephan cze lehen gehabt hat, vnd darvemb verczeihen wir vnz der egnanten aigenschaft an den vorgnanten gveten dacz Melben vnd dacz Herhab vnd dez czehentz dacz Vevchtenpach mit verchvend disez priefz, der veringsigelt ist mit vnzern paiden ingsigeln, dez probstz vnd dez conventz. Der prief ist geben nach Christus gepvrd, drewczen hvndert iar, dar nach in dem sechsvndfvnfczigstem iar, an send Poelten tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 158, S. 163