"Ich, Pilgreim(1) von Tannberch, vnd ich, Gvndacher(2) von Tannberch, vnd alle vnser erben, veriehen offenbar an dem prief allen den, die in sechent oder hoerent lesen, daz wir mit wol bedachten mvet vnd nach rat vnd gvnst vnser paider vrevnt, verwechselt haben vnserev gvet dacz Wurmprant(3) mit allen nvczen vnd rechten vnd czehent, die dar czve gehoerent, versuecht vnd vnversuecht, wie die gnant sint, die auch lechen sint gewesen von meinem herren dem pyscholf vnd von seinem gotzhavs cze Pazzaw, vnser vrawen vnd irem convent dacz sand Marein Slag, vnd auch mein herre von Pazzaw, pyscholf Gotfrid(4) cze den selben czeiten vnser vrawen czv dem vorgnanten chloster sein lechenschafft auf den vorgnanten gveeten cze Wurmprant geaygent hat. Da wider hat vns der probst Janns(5) cze den czeiten vnd sein convent dacz send Marein Slag einen wider wechsel geben von irem chloster, den hof dacz Melben(6) vnd ain gvet dacz Herhag(7), gelegen innerhalb dez Pænholcz(8), mit allen den nveczen vnd rechten, die auch da czve gehoerent, wie die gnant sint, vnd den czehent dacz Vevchtenpach(9), versucht vnd vnversucht, paidenthalben an allez gever. Vnd sint der vorgeschriben sache dez wider wechsels czevg her Chadolt(10) von Valchenstain, cze den czeiten lantrichter cze Velden(11), vnd der erber ritter her Ekhart(12) der Stainpech, cze den czeiten avch marschalich meines herren von Pazzaw, vnd besunder ander pidber [!] leut genuech, vnd sein auch der gevt [!] dacz Wurmprant vnd dez cehentz ir gewern als landez recht ist in Oesterreich, wo in dez not geschiecht, dacz vnser vrawen chloster dacz sand Marein Slag, vnd da selbst dem probst vnd seinem convent, vnd daz in daz stæt bleib, darvebir gib ich Pilgreim von Tannberch disen prief cze ainem waren vrchvnde, versigelt mit mainem anhangvnden jnsigel, vnd mit hern Chadolts von Valchenstain anhangvnden jnsigel, vnd mit hern Ekhartz dez Stainpechen anhangvnden jnsigel: Darvnder verpind ich mich, egnanter Gvndacher von Tannberch, vnder den vorgnanten anhangvnden jnsigel, wanne ich cze den selben czeiten aigens jnsigels nicht gehabt han. Der prief ist geben nach Christ pvrt drevczen hvndert iar, dar nach in dem sechsvndfuenfczigstem iar, an send Philips vnd Jacobs tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 156 (S 123), S. 161-162