"Wir, pruoder Hainr[aich] probst(1), vnd der conuent gemainlich ze dem Slegel(2), bechennen vnd tuon kunt offenlich mit disem briefe daz wir innerchlichen betracht haben die grozzen guottête, die vns der durchleuchtig fuerst, vnser lieber genêdiger herre, herczog Ruodolff(3) ze Oestereich, ze Steyr, ze Kernden vnd ze Chrain, graf ze Tyrol, getan hat manichualtichlich vnd sunderlich die genad, die er vns nu besunderlich hat getan, daz wir ains in dem jar, swenne ez vns fueget, an der mautt ze Lyncz vnd an andern mautten auf dem wazzer verfueren mugen ain phunt weits salczes vnd vier phunt chlains salczes(4) an mautt vnd an irrung, als der brief sagt, den er vns von seinen fuerstlichen gnaden darvmb geben hat. Vnd haben im fuer vns vnd fuer vnser nachkomen verhaizzen vnd gelobt, verhaizzen vnd geloben ouch pey unsrer gehorsam, daz wir iêrlich die weil er lebt, an aller heiligen abent begen sullen vnd wellen ein ampt vnd messe vmb hail der lebentigen vnd nach seinem tode auf den tag seiner hinuart ainen ewigen jartag mit selmesse, mit vigili vnd mit andern guottêten vnd schonhait, die darzuo gehoerent vnd als wir die unsern stiftern iêrlich begen. Vnd des ze vrkunt geben wir disen brief, versigelten mit vnsern jnsigeln, der geben ist ze Wienne an sand Merteins tag, nach Krists geburd drewzehen hundert jar vnd darnach in dem vier vnd sechczigistem jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 174, S. 177-178