"Wier, pruder Eberhart(1), abpt datz Zwetel(2), vnd di sammung alle des selben chloster, veriechen vnd tuen chunt allen leuten, di den prief lesent oder hoerent lesen, di nu sind vnd her nach chunftig werdent, daz wier mit verdachten muet vnd mit gueten zeitigen rat vnser selber recht vnd redleich verchaufft haben vnsers vrein aygen, ainen hof mit zwain weingarten vnd was dar zue gehoert ze veld vnd ze dorf, versuecht vnd vnuersuecht, wie iz genant ist, gelegen ze Wesendorf(3), der weilen waz Vlreichs Haynotleins(4), dem erbern mann Seyfriden dem Gscholer(5) vnd vrown Christein(6), vnd ier payder erben vmb achtzig pfunt Wienner pfenning, der wier gantz vnd gar gewert vnd gericht sein, also beschaydenlich, daz si vns alle jar an sand Merten tag da von dienen schullen ze rechtem purkchrecht in vnser hofstat da selbs gelegen pei dem obern tor, vnd haizzet daz Gruebel(7), zwelif Wienner pfenning vnd nicht mer, vnd schullen furbas vor vnser vrey vnd ledig sein vor aller vordrung, is sey stewr oder rowot vnd wie daz genant ist. Wer aber daz, daz si vns vnsern dienst ze den rechten tægen nicht raichten vnd geben, so schol wandel dor auf gen, als auf ander versezzens purchrecht vnd dienst nach des landes recht vnd gewonhait ze Oestereich, vnd wann si oder ier nachchomen den egenanten hof verchouffen oder seczen wellent, den selben chouf vnd sacz schullen si vns anpieten vnd suechen vnd schullen wier dor vmb wal haben viertzehen tag; wolt wier sein nicht, so schuellen si fuerbaz mit ierm vorgenanten hof vnd waz dar zue gehort, allen iern frum schaffen mit verchouffen, mit versetzen, als in aller pest fuegt, mit all den rechten, alz si in von vns gechouft habent, vnd mit sechs pfenning anlait, vnd als vil ablait; vnd di wandlung schol geschechen dacz Chrems(8) in vnserm hof vor vnserm hofmaister. Wier sein ouch vnuerschaidenlich des vorgenanten Seyfrids(5) vnd seiner hovsvrown(6) vnd ier erben des hofs recht gwern vnd scherm fuer all ansprach, als scherms vnd purchrechtz recht ist vnd gewonhait in dem land ze Oestereich, vnd waz in dar an ab gieng, daz schullen si haben auf vns vnd ouf all den guetern, di wier haben in dem land ze Oestereich. Vnd daz der chouf vnd di wandlung also stet vnd vnczebrochen beleib, dor veber so geb wier in den brif, versigelten mit vnserm jnsygel, vnd ouch mit der sammung jnsygel, der geben ist nach Christ gepuerd vber dreutzechen hundert jar, dar nach in dem fumf vnd sechtzigistem jar, an der heiligen jvnchvrown sand Ceciligen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 175 (S 130), S. 178-179