"Ich Janns von Marspach(1) vergich an dem prief, daz mein mueter(2) vnd ich vnd mein hausfrawe(3) hawen gestiftet ain chappellen in vnserer veste dacze Sprinczenstayn(4) in Rorwecher(5) pharre, vnd wier wellen zu der selben chappellen hawen vnseren wesunderen chappellan(6), der vnze messe dar inne sprech, vnd der selbe chappellan schol nemmen vnd im wehalten zu seynem nucze alles daz oppher, daz da wierth in der chappellen zu aller zeith, auer allev Gotes rech vnd pherleichev rech, iz sey tauffe, peichte vnd wie di genanth sint, di schol der pharrer von Rorwach, wer zu den zeyten pharrer ist oder wiert, vnse raychen vnd vnserem gesinde, wan des noth geschiech, vnd fuer das oppher, daz vnser chappellan schol in nemmen von der chappellen, ham wier gegewen dem pharrer da ze Rorwach, der nu da ist oder da wiert, vnd seyner pharre ze hawen ewichleich di zeway gueth, di aygen sind da ze Winchel(7) mit allem rech, eren vnd nuezzen same wier sev inne gehawet hawen, vnd hawen daz allez getan mit der erberen herren willen vnd rath dez probstz vnd dez conuentz von sande Mareyn Slage(8), di diu vorgenanten chyrychen daze Rorwach ze leichen hawent, iz schol auch der pharrer daze Rorwach, der da ist oder wiert, wegen ewichleich aynen iartag(9) alle iar in der uasten wochen nach sande Merteynz(10) tag dez awendez mit vigili vnd dez margenz mit sechs messen, meynes vaters sel, heren Janzen von Marspach(11), vnd meynes wrueder sel, Werenhartes(12), den Got genad, vnd aller meiner vorvoderen vnd nach chunftigen selen, er schol auch der selben selen alle suntag gedenchen daze Rorwach mit name auf dem lekter(13). Vnd wi ofte der pharrer daze Rorwach, der nu da ist oder wiert, den vor genanten iartag versaumet vnd nit weget, so schol man in phenten mit seynem guethleichen willen fuer ayn halp phvnt Wyener phennygen, vnd schol das selwe hawe phvnd phennygen gewen alse wo hin, wo hin man wil, das man da mit wege den egenanten iartag. Js schol auch der chapelan in der vorgenanten chapellen dehain leych nicht wesyngen vnd noch dehaynen iartag da nicht wegen, noch auch dehayner pherreleichen rech sich nicht vnder ziechen. Wer auer, das er sich der vor genanten pherleychen nuezzen indert vnder wund, als oft das gescho [!], so schol er mit rechtem rech ye fuer aynen phennich dem parrer [!] feruallen seyn sechich ||
phennygen. Jch vorgenanter Jans pin auch foget vnd schermer(14) mit allen meinen erben der vor genanten gueter ze Wynchel an alle nucze vnd pesverunge. Vnd das di red allev stet vnd vnzewrochen weleibe, dar vber giw ich den wrief, verinsidelet mit meinem anhanvnden insidel, auch zv einer pessereren [!] sicherhait Jacobs ab dem Perig(15) anhanvnden insidel, im vnd seinen erben an saden. Der wrief ist gegewen nach Christet gepuerd tausend iar vnd drevhundert iar, dar nach in dem neunvndsechczisten iar, an sand Jorgen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 180 (S 131), S. 181-182