"Ich, her Rueger ab dem Perig(1), vnd mein hausfrowe Pericht(2), vnd all vnser erben veriechen offenwar mit dem prief vnd tuen chunt allen den, die in sechent oder horent lesen, das wier mit wol bedachtem muet vnd gunst, nach vnser pesten frevnt rat, verseczt haben vnser dorf dacz Geleiten(3), gelegen pei Putresperig(4) an Rorwecher pharr, dem pharrer ze Rorwach(5), der do ist oder chumftig wiert, vmb zway vnd dreysigk phunt Wienner phenning, vnd das guet in dem Stocheth(6), gelegen pei Liechtenaw(7), do Oett(8) auf gesezzen ist, vmb zechen phunt Wienner phenning, mit allen den ern, rechten vnd nuczen, die dar zue gehorent, als wiers selben haben jnne gehabt, versuecht vnd vnuersuecht, ze holtz vnd ze veld. Wier sein auch dez vor genanten satz dez pharrers, swer der do ist oder chumftig wiert, an aller der stat, do yem des not geschiecht nach lancz recht, vnd was dem pharrer an dem vor genanten satz ab gieng, wie tann schaden des der pharrer nem, den er gesprechen mocht pei sein trown an ayd vnd vngesworen, den schullen wier iem ab tuen. Wier haben auch vollen gwalt, alle iar jarchleich ze losen vor der liechtmisse vierzechen tag oder dar nach in vierzechen tagen, vnd ich egenanter Rueger ab dem Perig vnd mein hausfrowe Pericht haben auch gegeben mit vnserm guetleichen willen vnd nach aller vnser freunt rat vnsern weingarten, der gelegen ist pei Radendorf in dem Lindentobel(9) den pessern, dem pharrer ze Rorwach, der do ist oder chumftig wiert, mit allen ern, rechten vnd nuczen, alz wiern haben inne gehabt, vnd haben auch furbas chain ansprach nach dem weingarten nymmer mer, also mit der beschaiden, daz vns der pharrer, der do ist oder chumftig wiert, schol vns haben von den ob geschriben setzen vnd von dem weingarten ewichleich alle montag ayn mess haben in der chappellen dacz Rorwach(10) vnd ein ewigen jartag, dez nachtes mit wigilij vnd dez morigen mit acht messen, vnd schol auch der pharrer vier chertzen haben ze der vigilij vnd ze den messen, iz schol auch der pharrer vnser bedechtnuzz haben mit nam ewichleich auf dem legker(11). Vnd ob das wer, daz man di setz loset, so schol das gelt an legen nach der næchsten frevnt rat, vnd ob das wer, daz der pharrer oder sein nach chumft die mess vnd den jartag nicht begieng, so schullen in di næchsten erben vnd freunt phenten, auf den setzen, oder wo die hab leit mit seinem guetleichen willen, vmb dreu phunt phenning, vnd schol er daz inndert verrer chlagen. Das die red also stet vnd vnzebrochen beleib, dar vber gib ich, vorgenanter Rueger ab dem Perig, den prief, versigelt mit meinem anhangunden jnsigel, vnd ze einer pessern sicherhait vnd ze einem waren vrchund, vnder meins lieben vetern Jacobs ab dem Perig(12) anhangundem jnsigel, dar vnder verpint ich mich, vor genanter Rueger ab dem Perig vnd mein hausfrow Pericht, vnd all vnser erben, die iezund sind oder furbas chumftig werdent, vnd verpinten vns mit vnsern guten trown an aydes stat, alles daz stet ze haben vnd ze vol fueren, daz an dem prief geschriben stet, vnd vnserm lieben vetern Jacob ab dem Perig vnd sein erben an schaden. Vnd auch ze einem pessern zeugnuzz gib ich vor genanter Rueger ab dem Perig den prief, versigelt mit meins lieben vetern Philips dez Stauffenperger(13) anhangundem jnsigel, vnd vnder vnsers liben vetern Sighartz dez Hautzenperger(14) anhangundem jnsigvl, in paiden vnd irn erben an schaden. Daz ist geschechen, do man zalt von Christes gepuerd dreutzen hundert iar, dar nach in dem neun vnd sechzigisten jar, an sand Alexij tag, dez heiligen peichtiger."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 181 (S 132), S. 182-183