"In Dei nomine amen. Nos, Henricus(1), prepositus totusque conuentus monasterii Plagensis(2), ordinis Premonstratensis, necnon Petrus(3), rector parochialis ecclesie in Fridemburch(4), ordinis eiusdem, notum fieri volumus presens scriptum inspectoribus vniuersis, quod vir nobilis, dominus Henricus de Rosenberch(5), regni Boemie mareschalcus, cum suis predecessoribus(6) monasterio nostro Plagensi inter alias pias donaciones jus patronatus(7) ecclesie in Fridemburga et possessionem ipsius assignauerit, decimas quoque maiores et minores eidem ecclesie prescripserit, prout hec in litteris tam ipsius domini Henrici et suorum predecessorum, qui eciam in litteris approbacionis et ratificacionis nobilissimi domini Petri de Rosemberg(8), summi regni Boemie camerarii felicis recordacionis de voluntate filiorum suorum nobilium dominorum Petri et Iodoci de Rosemberg(9), nobis et nostro monasterio datis, plenius continetur. Tamen decime minores, puta, lini et caulium hucusque a prima fundacione possessionem nusquam habere potuimus. Ideo, arbitrio et ordinacioni nobilissimorum dominorum nostrorum, domini Petri(10) et domini Johannis(11) de Rosemberg, vnacum predictis ciuibus et communitate(12) in Fridemburch tamquam de nouo ipsa ecclesia dotarj debeat nos comiseramus, qui deliberato animo invocato Dei auxilio pronunciauerunt inter nos, quod iam dicti incole de Fridemburg eorumque successores perpetue sue predicte parochiali ecclesie et plebano, qui pro tempore fuerit, mediam decimam siue vicesimum manipulum lini iuxta ritum alibi consuetum, de ipso lino solvere et decimare teneantur. Item pronunciauerunt, quod pro media parte decime caulium siue olerum quilibet de vno quolibet manso integro, qui in vvlgari purchrecht dicitur, soluat perpetue ipsi plebano et ecclesie per quatuor denarios Patauienses, quam pronunciacionem et arbitrium gratam et ratam habemus et habere uolumus perpetuis in antea temporibus bona et sincera fide pro nobis et omnibus nostris successoribus, promittentes dictos ciues et omnes eorum successores ullo umquam tempore maioribus pro decimis, quam dicti domini nostri, ut prescriptum est, pronunciauerunt inquietare, nec posse mouere, sed in his totaliter contentari harum nostrarum, quibus sigilla nostra, uidelicet prepositi, conuentus et plebani predictorum duximus appendenda. Et ampliorem propter cautelam petimus reuerendissimum in Christo patrem et dominum nostrum, dominum Johannem sancte Pragensis ecclesie archiepiscopum(13), apostolice sedis legatum, quatenus prescriptam institucionem et arbitrium de sua consueta benignitate graciosius dignetur confirmare. Euidentem enim proinde profectum supradicta in Fridemburch ecclesia assequetur, quem infra multa temporum curricula minime ualuit obtinere, quod sub nostre protestamur consciencie puritate. Actum et datum in Fridemburch, in presencia domini Marchquardi de Porzieschin(14), domini Wenceslai(15) plebani de Baworow, Nicolai(16), procuratoris in Rosemberg, anno Domini millesimo trecentesimo septuagesimo quarto, die passionis decem millium martyrum santorum."||
"Nos quoque, Johannes, Dei gratia sancte Pragensis ecclesie archiepiscopus, apostolice sedis legatus, predictam pronunciacionem et ordinacionem ac omnia et singula suprascripta de consensu et auctoritate nostra facta, rata et grata habentes, auctorisamus, ratificamus, approbamus et ex certa nostra sciencia auctoritate ordinaria confirmamus. Jn cuius rei testimonium et ad maiorem euidenciam ac roboris firmitatem presentes litteras sigilli nostri maioris munimine iussimus roborari. Datum et actum Prage, anno Domini millesimo trecentesimo septuagesimo quarto, die sexta mensis julij."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 186 (S 133), S. 186-188