"Ich, Seydel der Gesoler(1) von Wesendorf(2) vnd mein hausvroew(3) vnd all vnser erben, wier vergehen offenleich mit dem prief vnd tuen chunt, daz wier gelten schullen Troestlein dem Juden(4), der Cyperlin(5) aydem ze Chrems(6) vnd seiner hausvroewn vnd alln iern erben viertzik phunt Wyenner phenning, der wier sew richten vnd wern schullen von weichnachten, di nu schierist choment, vber ain gantz iar. Vnd waz sew dann lenger stent, so get fuerbaz auf ain ygleich phunt all wochen vier phenning ze schaden. Vnd wann dew iuden iers gelts nicht lenger peyten wellent, so schulln wier sew vnuerzogenchleich richten vnd weren gar vnd gantz, haupguetz vnd schadens. Vnd ze einer pessarn sycherhait hab wier den juden ze phant gesatzt ledichleich vnd vnuerchumert mit allen nuetzen vnsern hof, der gelegen ist ze Wesendorf ze noest Göschlein(7) dem smyd mit alle dew vnd dar zue gehoert ze veld vnd ze dorff, versuecht oder vnuersuecht mit puerchherren hant Hainreichs(8) dez mawrer, dem man do von geit ze purchrecht in daz Gruebel(9) all iar zwelyf phenning an sand Merten tag. Vnd waz den juden dar an abget, daz schullen sew haben auf vns vnd auf aller der hab, di wier haben in dem land ze Oesterreich, do von sew wern schol an fuerbot vnd an chlag, wer der fuersten gewalt hat in dem land ze Oesterreich, wir sein lembtig oder tod, ob wier sew selber nicht enwerten. Daz lub wier in, alles stæt ze haben mit vnsern trewn an alles geuar. Vnd wann ich obgenanter Seydel der Gesoler vnd der egenant puerchherr Hainreich der mawrer, di zeit nicht aygner insygel gehabt haben, dez hat er mit sampt mier gepeten di erbern Freydangen(10), di zeit richter in der Wochaw, vnd Jacoben von Jeuching(11), daz sew der sach gezeugen sind mit irn anhangunden insygeln, yn an schaden. Der prief ist geben nach Christi gepurd dreutzehen hundert iar, dornach in dem vier vnd sybentzkistem iar, an sand Kathrein tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 187 (S 134), S. 188-189