"Jch, Joerg Hawczenperger(1) vnd Anna mein hawsvraw vnd all vnser erben, wier vergehen offenleich mit dem prieff vnd tuen chund allen den, di in sechent, horent oder lesent, daz wier innichkleich durch Got vnd durch vnser vnd aller vnser vor vodern sel hail vnd salichait willen ledichleich geben vnd gemacht haben vnserm lieben vrewnt Niclas von Roerbach(2), vnsrew zway gueter, genant dacz Schoenperg(3), vnd dew gelegen sint in Rarwekcher pharr, vnd di vnser vreiz aygen gewesen sind, vnd do von er all jar jaerleich gutes geltes wol gehaben mag siben phunt Wienner phenning, an allen abganch; wir geben im auch dew vorgenanten gueter ledichleichen aus vnsern nucz vnd gewer in dew seinen mit allen den eren, rechten vnd nuczen, dew dar zu gehorent oder do von choemen muegen, vnd haben im dew vorgenante gueter geben, daz er do mit zu priesterleicher wierdichait choemen schol, vnd dor vmb verczeich wir vns der vorgenanten gueter mit dem gegenwuertigen prieff alzo weschaidenleich, daz wier, [au]ch niemant von vnsern wegen chain ansprach noch vadrung nimmermer dar nach gehaben schuellen noch muegen, weder mit geistleichen noch weltleichen recht. Ez mag auch der vorgenant vnser vrewnt Niclas von Roerbach mit den vorgenanten guetern allen seinen vrum wol geschaffen mit verchawffen vnd mit versetzen, wi im lieb oder rechtz ist. Vnd daz alles zu einem waren vrchunt geb wier im den prieff, versigelten mit vnserm anhangunden jnsigel, vnd zu einer merern sicherhait mit dez wolweschaiden Chaerleins von Wisen(4) auch anhangunden jnsigel, daz er durch vnser vleizzigen pet willen an den priff gehangen hat, im vnd allen seinen erben jn schaden. Dar vnder wier vns allew vnuerschaidenleich verpinden mit vnsern trewn an aydes stat, trewleichen an geuer, war vnd staet ze haben, daz an dem priff geschriben stet. Der priff [ist] gegeben, do man zalt von Christ gepuerd drewczehen hundert jar, dar nach in dem trew vnd achczkisten jar, an sand Philipptz tag vnd sand Jacobs tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 197, S. 198-199